Posted: 02/14/2012 11:44 AM IST

మాజీ ముఖ్యమంత్రి, దివంగత నేత దామోదరం సంజీవయ్య జయంతి సందర్భంగా ఆయన విగ్రహానికి పూలమాల వేసి నివాళులర్పించిన ముఖ్యమంత్రి కిరణ్ కుమార్ రెడ్డి, ఆయన సేవలను కొనియాడారు. ఉప ముఖ్యమంత్రి దామోదర రాజనరసింహ, పిసిసి అధ్యక్షుడు బొత్సా సత్యనారాయణ, మంత్రులు దానం నాగేందర్, పొన్నాల లక్ష్మయ్య, గంటా శ్రీనివాసరావు, జానారెడ్డి, బసవరాజు సారయ్య, పితాని సత్యనారాయణలు పాల్గొన్న ఈ కార్యక్రమంలో పేదల సంక్షేమం కోసం పాటుపడ్డ దామోదరం సంజీవయ్య చేసిన సేవలను గుర్తు చేసుకున్నారు.

కర్నూలు జిల్లా పెద్దపాడులో 14.2.1921 లో నిరుపేద కుటుంబంలో జన్మించిన దామోదరం సంజీవయ్య విద్యార్థి దశలోనే స్వాతంత్ర్య సమరంలో పాల్గొన్నారు. ఉమ్మడి మద్రాస్ రాష్ట్రంలో మంత్రిగా పనిచేసారు. 1950 నుంచి 1952 వరకూ దేశ ప్రొవిజనల్ పార్లమెంటులో సభ్యుడిగా పనిచేసారు. 11.1.1960 నుంచి 12.3.1962 వరకూ ఆంధ్రప్రదేశ్ ముఖ్యమంత్రి పదవినలంకరించారు. అఖిల భారత కాంగ్రెస్ పార్టీ కి అధ్యక్షుడిగా ఎన్నికైన ఆంధ్రప్రదేశ్ కి చెందిన మొదటి దళిత నాయకుడు సంజవయ్యే. లాల్ బహదూర్ శాస్త్రి ప్రధానిగా ఉన్న సమయంలో 1964 నుంచి 1966 వరకు, దామోదరం సంజీవయ్య కార్మిక, ఉద్యోగ శాఖామాత్యులుగా పనిచేసారు. హరిజనుడిగా ఉన్నత స్థాయిలో దేశసేవ చేసిన వారిలో దామోదరం సంజీవయ్య ప్రథములు.

దామోదరం సంజీవయ్య చేసిన సేవలకు గుర్తుగా ఆయన పేరుతో సంజీవయ్య పార్క్ హైద్రాబాద్ లోని ఒక పర్యాటక స్థలాల్లో ఒకటి. నాంపల్లి లోని పబ్లిక్ గార్డెన్స్ ఎదురుగా సంజీవయ్య విగ్రహ ప్రతిష్ట కూడా జరిగింది.

-శ్రీజ