Posted: 11/05/2012 11:38 AM IST

ముంబై నరమేధంలో దోషి మహమ్మద్ అజ్మల్ అమీర్ కసబ్ జ్వరంతో బాధ పడుతున్నాడు. కట్టుదిట్టమైన భద్రత గల అర్థర్ రోడ్ జైలులో ఆయనకు చికిత్స జరుగుతోందని పోలీసు వర్గాలు ఆదివారం వెల్లడించాయి. "కసబ్‌కు జ్వరం రావడంతో కొద్ది రోజులుగా ఆయనకు చికిత్స జరుగుతోంది. అతనికి డెంగ్యూ సోకిందేమోనన్న అనుమానంతో మూడు రకాల పరీక్షలు నిర్వహించారు. ఈ పరీక్షల్లో వచ్చిన ఫలితాలు డెంగ్యూను ద్రువీకరించలేదు'' అని పేరు వెల్లడికి ఇష్టపడని ఒక అధికారి చెప్పారు. "వైద్యులు ఎటువంటి పొరపాటుకు అవకాశం ఇవ్వదలచుకోలేదు. వైద్యుల పర్యవేక్షణలో చికిత్స పొందుతున్న కసబ్ బాగానే స్పందిస్తున్నారు'' అని ఆ అధికారి వివరించారు. 2008 నవబర్ 26నాటి ముంబై ముట్టడిలో పట్టుబడిన ఏకైక పాకిస్థాన్ ఉగ్రవాదిని బాంబు ప్రూఫ్ అండాకారపు సెల్‌లో ఉంచిన సంగతి తెలిసిందే. మరణశిక్ష ఖరారైన కసబ్ దాఖలు చేసిన క్షమాభిక్ష పిటిషన్‌ను ఇటీవల రాష్ట్రపతి తిరస్కరించారు.