Posted: 11/15/2012 02:39 PM IST

అమెరికా సైనిక ఉన్నతాధికారులను సెక్స్ కుంభకోణాలు ఉక్కిరిబిక్కిరి చేస్తున్నాయి. ఇప్పటికే సీఐఏ చీఫ్ డేవిడ్ పేట్రస్ వివాహేతర సంబంధంతో తన పదవికి రాజీనామా చేయగా మరో సైనిక ఉన్నతాధికారి జాన్ అలెన్‌పై కూడా ఇలాంటి ఆరోపణలే వచ్చాయి. పేట్రస్ సెక్స్ కుంభకోణాన్ని విచారిస్తున్న ఎఫ్‌బీఐ బృందం అలెన్ వ్యవహారాన్ని బయటపెట్టింది. జనరల్ అలెన్ మరో వివాహితకు పంపిన ఈ-మెయిల్స్ వెలుగులోకి వచ్చాయి. అలెన్‌కు 37 ఏళ్ల సామాజిక కార్యకర్త జిల్ కెల్లీతో వివాహేతర సంబంధం ఉన్నట్లు ఎఫ్‌బీఐ అనుమానిస్తోంది. సీఐఏ మాజీ అధినేత డేవిడ్ పేట్రస్, ఆయన వివాహేతర సంబంధం పెట్టుకున్న బ్రాడ్‌వెల్‌కు జిల్ కెల్లీ స్నేహితురాలు. తనకు ఈ-మెయిల్ బెదిరింపులు వస్తున్నాయని కెల్లీ ఎఫ్‌బీఐ అధికారులను ఆశ్రయించారు. అవి బ్రాడ్‌వెల్ అకౌంట్ నుంచే వచ్చినట్లు ఫెడరల్ అధికారులు కనిపెట్టారు. ఆ ఈ-మెయిల్‌లను తనిఖీ చేయగా పీట్రస్‌తో ఆమెకు వివాహేతర సంబంధం ఉన్నట్లు అందులోనే బయటపడింది. అంతేకాదు అలెన్...జెల్లీ కెల్లీకి వందల ఈ-మెయిల్‌లు పంపినట్లు ఎఫ్‌బీఐ అధికారులు తేల్చారు. అందులో కొన్ని కైపెక్కించే మాటలతో కూడి ఉన్నాయని వారంటున్నారు. అయితే జెల్లీ కెల్లీతో తనకెలాంటి వివాహేతర సంబంధం లేదని అలెన్ వెల్లడించారు. పదోన్నతి కింద నాటో సుప్రీం కమాండర్‌గా అలెన్‌ను అమెరికా ప్రభుత్వం నియమించాల్సి ఉన్నా ఎఫ్‌బీఐ విచారణ కొనసాగుతున్నందున అది ఆగిపోయింది.