Posted: 01/02/2013 03:48 PM IST

టీడీపీ  ఎమ్మెల్యే  పరిటాల  సునీత ఇంట్లో  పోలీసులు తనీఖిలు  చేయటం పై  ఆ పార్టీ నాయకులు మండిపడుతున్నారు.  పరిటాల సునీత కొడుకు  పరిటాల శ్రీరామ్ పై అక్రమ ఆయుధాలు కలిగి ఉన్నడనే దానిపై  కేసు పెట్టినట్లు తెలుస్తోంది.  ఆ కేసు నిమిత్తం పోలీసులు  అనంతపురంలో రెండు రోజుల నుండి   తనిఖీలు చేస్తున్నారు.   అయితే   పరిటాల సునీత  ఇంట్లో  అర్థరాత్రి  సోదాలు  నిర్వహించి  పోలీసులు ఓ మహిళా శాసనసభ్యురాలి  గౌరవానికి  భంగం  కలిగించారని తెదేపా  నేతలు మండిపడ్డారు.   నేరస్తుడి మాటలు నమ్మి మహిళా  ఎమ్మెల్యే  పట్ల పోలీసులు ప్రవర్తించే తీరు  ఇదేనా అని వారు నిలదీశారు.  ఓ మహిళ  హోంమంత్రిగా ఉన్న రాష్ట్రంలో  భర్తను  కోల్పోయిన తోటి శాసనసభ్యురాలని  ఇలా  అగౌరవించడాన్ని  వారు తీవ్రంగా తప్పబట్టారు.  దీనికి ముఖ్యమంత్రి , స్పీకర్ , డీజీపీ  బాధ్యత వహించాలని  డిమాండ్ చేశారు.  పరిటాల సునీత  ఇంట్లో సోదాలు  చేసిన  పోలీసులు ఏం సాధించారని  వారు ప్రశ్నించారు.  కాంగ్రెస్ అధికారంలోకి వచ్చాక తెదేపా శ్రేణులపై  ఏదోవిధంగా  దాడులు చేయిస్తున్నారని  దుయ్యబట్టారు.  సెర్చ్ వారంట్ , సభాపతి  అనుమతి లేకుండా పోలీసులు  అర్థరాత్రి  సోదాలు  ఎలా నిర్వహించారో సమాధానం చెప్పాలని  తెదేపా నేతలు  పెద్దిరెడ్డి చంద్రశేఖర్  తదితరులు డిమాండ్ చేశారు.