Posted: 02/20/2013 08:33 PM IST

వైఎస్పార్ కాంగ్రెస్ పార్టీ అధ్యక్షుడు జగన్ మరో షాక్ తగిలింది. అక్రమాస్తుల కేసులో రూ. 122 కోట్ల రూపాయల ఆస్తులను స్వాధీనం చేసుకోవడానికి ఎన్‌ఫోర్స్‌మెంట్ డైరెక్టరేట్ (ఈడీ)కు న్యాయ ప్రాధికార సంస్థ అనుమతి ఇచ్చింది. గతంలో జగన్ ఆస్తుల కేసులో రూ. 51 కోట్లు, ఎమ్మార్ ప్రాఫర్టీస్ కుంభకోణం కేసులో రూ. 71 కోట్ల ఆస్తుల్ని ఈడీ అటాచ్ చేసిన విషయం తెలిసిందే. ఈ రూ.122 కోట్ల ఆస్తులను చూసుకునేందుకు ఈడీ అనుమతి పొందింది. దీనిపై ఈడీ న్యాయ ప్రాధికార సంస్థ విచారణ జరిపి ఈ మేరకు ఈడీకి అనుమతి ఇచ్చింది.  జగన్ ఆస్తుల కేసులో ఈడి మనీలాండరింగ్ చట్టాల ఉల్లంఘనలను ఈడీ నిర్ధారించి గతంలో నోటీసులు జారీ చేసింది. ఈ మేరకు ఈడి రూ. 51 కోట్ల రూపాయల విలువ చేసే స్థిర, చరాస్తులను జప్తు చేయడానికి నిర్ణయం తీసుకుంది. కుట్రల ద్వారా తాము ఆస్తులు జప్తు చేసిన సంస్థలు ప్రభుత్వం నుంచి ప్రయోజనం పొందాయని ఈడీ వ్యాఖ్యానించింది. ఈ మేరకు నోటీసులు జారీ చేసింది. హెటిర్ డ్రగ్స్‌కు చెందిన 35 ఎకరాల భూమిని, రూ.3 కోట్ల రూపాయల ఫిక్స్‌డ్ డిపాజిట్లను ఈడీ జప్తు చేయాలని నిర్ణయం తీసుకుంది.

అలాగే జననీ ఇన్‌ఫ్రాకు చెందిన 13 ఎకరాల భూములను కూడా జప్తు చేయడానికి అనుమతి పొందింది. వైయస్ జగన్‌కు చెందిన జగతి పబ్లికేషన్స్ సంస్థకు చెందిన రూ. 14.5 కోట్ల రూపాయల ఫిక్స్‌డ్ డిపాజిట్లను ఈడి జప్తు చేసింది. అరబిందో ఫార్మాకు చెందిన 96 ఎకరాల భూమి, రూ. 3 కోట్ల రూపాయల ఫిక్స్‌డ్ డిపాజిట్లను ఈడీ జప్తునకు నోటీసులు జారీ చేసింది. హెటిరో డ్రగ్స్, అరబిందో ఫార్మా సంస్థలకు 75 ఎకరాల భూములను కేటాయించడం వల్ల ఆ సంస్థలు రూ. 8.6 కోట్ల రూపాయల చొప్పున లబ్ధి పొందాయని ఈడి నిర్ధారించింది. ట్రైడెంట్‌కు 30.33 ఎకరాల భూములను కేటాయించారని, దాని వల్ల ఆ సంస్థ రూ. 4.3 కోట్ల రూపాయల ప్రయోజనం పొందిందని ఈడీ వివరించింది. హైదరాబాదులోని గచ్చీబౌలి బౌల్టర్ హిల్స్‌లో గల 34 విల్లా స్థలాల స్వాధీనానికి ఈడికి అనుమతి లభించింది. ఎమ్మార్ ప్రాఫర్టీస్‌కు చెందిన రూ. 7 కోట్ల ఆస్తులను ఈడీ స్వాధీనం చేసుకోనుంది.