Posted: 05/03/2013 05:04 PM IST

కరీం నగర్ లోని సిక్కులు పాకిస్తాన్ జైల్లో సరబ్ జిత్ సింగ్ మృతికి నిరసనగా కరీం నగర్ తెలంగాణా చౌక్ లో పాకిస్తాన్ దిష్టిబొమ్మను తగలబెట్టి, పాకిస్తాన్ ఉదాసీనతే అందుకు కారణమంటూ పాకిస్తాన్ కి వ్యతిరేకంగా నినాదాలు చేసారు. 

సోహన్ సింగ్ నేతృ్త్వంలో సిక్కులంతా కలిసి భారత పతాకాన్ని పట్టుకుని తెలంగాణా చౌక్ ని చేరుకుని, పాకిస్తాన్ దిష్టిబొమ్మను తగులబెట్టారు.  లాహోర్ జైల్లో సరబ్ జిత్ సింగ్ మీద దాడిని ఖండిస్తూ, కావాలనే పాకిస్తాన్ ప్రభుత్వం సరబ్ జిత్ సింగ్ కి సరైన వైద్య సేవలను అందించలేదని పాకిస్తాన్ ని దుయ్యబట్టారు. 

ప్రభుత్వాన్ని తగిన న్యాయం చెయ్యమని, జరిగిన సంఘటనలో సత్యాన్ని బహిర్గతం చేసి పాకిస్తాన్ ని ఎండగట్టమని కోరుతూ, అంతకు ముందు పాకిస్తాన్ సైనికులు భారత్ సైనికుని తలను నరికి తీసుకెళ్ళిన ఘాతుక చర్యను కూడా గుర్తుచేసుకున్నారు.

సరబ్ జీత్ సింగ్ ని త్యాగజీవిగా అభివర్ణిస్తూ ఇకనైనా పాకిస్తాన్ తన ధోరణి మార్చుకోకపోతే తగిన గుణపాఠం చెప్పవలసి వస్తుందని హెచ్చరించారు. 

అయితే, ఇదే ఘటన జమ్మూ కోట్ భల్వాల్ జైల్లో జరిగింది.  అక్కడ పాకిస్తాన్ ఖైదీ సోనావుల్లాఖాన్ మీద భారత్ ఖైదీలు దాడి చేయగా బాధితుడి పరిస్థితి విషమంగా ఉంది.  రాజకీయ లబ్ధికోసం ఎవరైనా ఈ ఘటనలను లేవనెత్తినా, ఎక్కడో ఒకచోట ముగింపు పలకకపోతే ఇవి ఇలాగే కొనసాగుతాయి. 

-శ్రీజ