విశాఖలో అధికారుల మీద తిరుగుబాట్లు

Posted: 05/19/2013 04:28 PM IST

 

 

 

విశాఖపట్నం పరిధిలో అధికారుల మీద చెయిచేసుకోవటం ఇది రెండవ సంఘటన.  పెందుర్తి మండలం చిన ముషిడివాడలో కొందరు ప్రభుత్వ భూమిని ఆక్రమించారన్న వార్త అందటంతో హుటాహుటిన ఆ స్థలాలను పరిశీలించటానికి వెళ్ళిన రెవిన్యూ సిబ్బందిని అక్రమంగా ఆక్రమించిన ముఠాలు విచక్షణా రహితంగా కొట్టాయి.  

పెందుర్తి తహసీల్దార్ పంపగా వెళ్ళిన ఇద్దరు ఆర్ ఐ లు, ముగ్గురు వీఆర్ వోలను దుండగులు పొర్లించి మరీ తిట్టుకుంటూ కొట్టుకుంటూ బయటకు తోసారు.  బాధితుల ఫిర్యాదు మేరకు కలెక్టర్ ఆదేశించగా పోలీసులు రంగ ప్రవేశం చేసి ఆక్రమణలకు, హింసకు పాల్పడ్డవాళ్ళలో కొందరిని అరెస్ట్ చేసారు.  

ప్రభుత్వ భూమిని కాపాడటానికి అధికారుల ఆదేశం మీద వెళ్ళిన ప్రభుత్వోద్యోగుల మీద చెయి చేసుకోవటం నేరమంటూ బాధితులు తీవ్రస్థాయిలో ఆరోపించారు.

అక్రమంగా తరలిస్తున్న ఇసుక లారీలను అడ్డుకోజూసిన అధికారులను కూడా మొన్న అర్థరాత్రి పట్టుకుని కొట్టి ఇసుకను తరలించుకునిపోయారు. 

-శ్రీజ