వైయస్ జగన్‌కు ఈడి మరో షాక్

Posted: 05/31/2013 08:58 PM IST

వైఎస్ఆర్ కాంగ్రెస్ పార్టీ అధినేత వైఎస్ జగన్మోహన్ రెడ్డి కి మరో షాక్ దెబ్బ తగిలింది. అక్రమాస్తుల కేసులో అరెస్టైన జగన్ కు ఈడి దెబ్బలు తగులుతూనే ఉన్నాయి. ఇప్పటి వరకు జగన్ ఆస్తులు జప్తుపేరుతో ఈడి మూడు సార్లు జగన్ కేసులో అస్తులను జప్తు చేసినట్లయింది. మూడు విడతలు మొత్తం 229.40 కోట్ల రూపాయల విలువ చేసే ఆస్తులను ఈడి జప్తు చేసింది. ఇంతకు ముందు 143.74 కోట్ల రూపాయల విలువ చేసే ఆస్తులను, మూడు ఫార్మా కంపెనీలకు, జననీ, జగతి సంస్థలకు సంబంధించి 51 కోట్ల రూపాయల విలువ చేసే ఆస్తులను ఈడి జప్తు చేసింది. అయితే ఈ సారి హైదరాబాదులోని జూబ్లీహిల్స్‌లో గల ఓరియంటల్ బ్యాంక్ ఆఫ్ కామర్స్‌లోని 34.66 కోట్ల రూపాయల విలువ చేసే ఫిక్స్‌డ్ డిపాజిట్లను జప్తు చేస్తూ ఈడి ఆదేశాలు జారీ చేసింది. ఈ మేరకు ఈడి ప్రకటన జారీ చేసింది. ఎకె దండమూడి, కన్నన్, మాధవ్ రామచంద్రన్ పెట్టిన పెట్టుబడులను జప్తు చేస్తున్నట్లు ఈడి తెలిపింది. కుట్ర, మోసం ద్వారా నేరానికి పాల్పడినట్లు నిర్ధారణ అయిందని, అందుకే ఫిక్స్‌డ్ డిపాజిట్లను జప్తు చేస్తున్నామని ఈడి తెలిపింది. కన్నన్ జగన్ సంస్థల్లో ఐదు కోట్ల రూపాయల పెట్టుబడి పెట్టినట్లు సమాచారం. మాధవ్ రామచంద్రన్ దుబాయ్‌కి చెందిన వ్యాపారవేత్త.