అసెంబ్లీకి బిల్లు రాదు... దిగ్విజయ్

Posted: 11/08/2013 12:20 PM IST

కేంద్ర హోం శాఖ మంత్రి సుశీల్ కుమార్ షిండే ఈ నెలాఖరులోగా తెలంగాణ బిల్లు వస్తుందని తెలిపారు. షిండే ప్రకటన చేసిన 24 గంటలు కూడా గడవక ముందే .. రాష్ట్ర వ్యవహారాల ఇన్ చార్జి దిగ్విజయ్ సింగ్ మరో ప్రకటన చేసి సంచలనం స్రుష్టించారు.

 

రాష్ట్ర విభజన బిల్లు అసెంబ్లీకి రాదని...తీర్మానం బిల్లు వస్తుందని రాష్ట్ర వ్యవహారాల ఇన్‌చార్జి దిగ్విజయ్‌సింగ్ తెలిపారు. ఈరోజు ఉదయం మీడియాతో మాట్లాడుతూ తెలంగాణపై సీడబ్ల్యూసీ నిర్ణయం మేరకు ముందుకు వెళ్తామన్నారు. విభజనపై ఇతర పార్టీలు వెనక్కి వెళ్లినా కాంగ్రెస్ వెనక్కి వెళ్లదని దిగ్విజయ్ స్పష్టం చేశారు.

 

పార్లమెంట్ శీతాకాల సమావేశాల్లో బిల్లు వచ్చే అవకాశం ఉందన్నారు. ముఖ్యమంత్రి కిరణ్ కుమార్ రెడ్డి పదవి నుంచి కిరణ్‌ను మార్చబోమని...కాంగ్రెస్‌ పార్టీకి కిరణ్ వారి కుటుంబం మొత్తం విధేయులే అని అన్నారు. ముఖ్యమంత్రి తన అభిప్రాయం వెల్లడించే హక్కు ఉంటుందని అభిప్రాయ బేధాలున్నప్పటికి సీఎం వ్యతిరేకంగా వెళ్లరని చెప్పుకొచ్చారు. నేటి సమన్వయ సమవేశం పార్టీ నేతలను సమన్వయ పరిచేందుకు ఏర్పాటు చేసిందని ముఖ్యమంత్రి మార్పు అజెండా కాదని స్పష్టం చేశారు.