కాంగ్రెస్ కుట్రను బట్టబయలు చేస్తా- చంద్రబాబు నాయుడు

Posted: 02/01/2014 09:11 AM IST

తెలుగు దేశం పార్టీ అధ్యక్షుడు చంద్రబాబు నాయుడు రాష్ట్ర విభజన బిల్లు మీద తను మాట్లాడకుండా కాంగ్రెస్ పార్టీ కుట్ర చేసిందని ఆరోపించారు. 

ఏదైనా చర్చ జరిగినప్పుడు సాధారణంగా ప్రతిపక్షనాయకుడికి ముందుగా మాట్లాడే అవకాశం ఇస్తారు, అలాగే ఇచ్చారు కూడా.  కానీ ఆ సమయంలో ఆయన తర్వాత మాట్లాడతానని చెప్పారు.  తర్వాత మొత్తం 86 మంది శాసన సభ్యులు బిల్లు మీద తమ అభిప్రాయాలను సభలో వెల్లడించారు.  చివరగా ముఖ్యమంత్రి కిరణ్ కుమార్ రెడ్డి మాట్లాడారు.  ఆ సమయంలో, ఆయన మాట్లాడిన తర్వాత తనకి సమయం ఇస్తామని తాను 27 న మాట్లాడవచ్చని ముఖ్యమంత్రి సభాపతి కూడా అన్నారని కానీ చివర్లో హడావిడిగా సభను వాయిదా వేసారని చంద్రబాబు అంటున్నారు. 

ఢిల్లీ లో రాసిన స్క్రిప్ట్ ప్రకారమే కాంగ్రెస్, తెరాస, వైకాపా లు నడుచుకుంటున్నాయని చంద్రబాబు శుక్రవారం జరిగిన మీడియా సమావేశంలో అన్నారు. 

విభజన బిల్లు విషయంలో జరిగిందంతా ప్రజాస్వామ్య స్పూర్తికి పూర్తిగా వ్యతిరేకంగా ఉందని అభిప్రాయపడ్డ చంద్రబాబు, బిల్లు సాధ్యమైనంత త్వరగా పార్లమెంటుకి పోవాలి అని రాష్ట్రపతి అనడంలో ఉద్దేశ్యమేమిటి, ఆయనకు ఆ అవసరమేమిటి అని ప్రశ్నించారు.  ఆర్టికిల్ 3 ప్రకారం రాష్ట్రాన్ని విభజించాలనే ఉద్దేశ్యంలోనే కేంద్రం ఉన్నట్లయితే అసలు బిల్లుని తయారు చేసి అసెంబ్లీకి పంపించవలసిన అవసరమేముందని ఆయన అడిగారు. 

కాంగ్రెస్ ఆడుతున్న ఈ హై లెవెల్ డ్రామాను బట్టబయలు చెయ్యటానికి తాను ఢిల్లీ వెళ్తన్నానని, అక్కడ రాష్ట్రపతి, ప్రధానమంత్రిని, ఇతర నాయకులను కలిసి అంతా తేల్చివేస్తానని చంద్రబాబు అన్నారు.  అలాగే బిల్లు మీద తన అభిప్రాయాలను నేరుగా రాష్ట్రపతికే అందజేస్తానని కూడా చంద్రబాబు అన్నారు.

-శ్రీజ