తెదేపా గుంటూరు ఎంపీ అభ్యర్థి మీద సిబిఐ విచారణ

Posted: 04/02/2014 01:46 PM IST

మాజీ మంత్రి గల్లా అరుణ కుమారి, ఆమె సమీప బంధువులతో పాటు ఆమె కుమారుడు, అమర్ రాజా గ్రూప్ ఆఫ్ ఇండస్ట్రీస్ మేనేజింగ్ డైరెక్టర్ గల్లా జయదేవ్ మీద కూడా పూర్తి స్థాయిలో దర్యాప్తు చెయ్యవలసిందిగా మంగళవారం నాడు నాంపల్లి సిబిఐ ప్రత్యేక న్యాయస్థానం సిబిఐ కి ఆదేశాలిచ్చింది. 

ఈ మధ్యనే తెలుగుదేశం పార్టీలో చేరిన గల్లా జయదేవ్ గుంటూరు లోక్ సభకి పోటీ చేస్తున్నారు.  ఆయనకు ఎన్నికలలో ప్రచారం చేస్తానని లోగడ మహేష్ బాబు ఒప్పుకోవటం కూడా జరిగింది.  పార్టీకి కాకుండా వ్యక్తిగతంగా మహేష్ బాబు జయదేవ్ కి మద్దతుగా ఎన్నికల ప్రచారంలో పాల్గొనటానికి సిద్ధమయ్యారు. 

ఎపిఐఐసి కి ఎమ్మార్ టౌన్ షిప్ అభివృద్ధికోసం కేటాయించిన హైద్రాబాద్ నానకరామ్ గుడా లోని స్థలంలో 2.2 ఎకరాల స్థలాన్ని కబ్జా చేసిన ఆరోపణను గల్లా కుటుంబం ఎదుర్కుంటోంది. 

పురుషోత్తమ నాయుడు అనే వ్యక్తి వేసిన పిటిషన్ మీద స్పందించిన సిబిఐ కోర్టు గల్లా కుటుంబంలోని కొందరు సభ్యుల మీద ఎఫ్ఐఆర్ నమోదు చెయ్యమని, ఈ కేసు లోతుల్లోకి వెళ్ళవలసిందిగా సిబిఐ ని కోరింది.

-శ్రీజ