ఎన్నికల కమిషన్ సిబ్బంది మీద చెయిచేసుకున్న తృణమూల్

Posted: 04/10/2014 03:38 PM IST

పశ్చిమ బెంగాల్ లోని మాల్డా జిల్లాలో మాణిక్ చక్ ప్రాంతంలో తృణమూల్ కాంగ్రెస్ కార్యకర్తలు, నాయుకుల అనుమతి లేకుండా బైక్ ర్యాలీ నిర్వహించారు.  ఎన్నికల కమిషన్ ఆదేశాల ప్రకారం బైక్ ర్యాలీలు నిషేధించబడ్డాయి. 

ఈ విషయం తెలుసుకున్న ఎన్నికల అధికారులు దీని మీద కేసు పెట్టటానికి సాక్ష్యాధారాల కోసం వీడియో తీస్తుండగా చూసిన తృణమూల్ కాంగ్రెస్ కార్యకర్తలు వాళ్ళ మీద చెయిచేసుకున్నారు. 

ప్రత్యక్ష సాక్షుల కథనం ప్రకారం, బైక్ ర్యాలీ మాణిక్ చక్ ఖయెర్తల పోకెట్ సమీపించేసరికి ఎన్నికల అధికారులు వీడియో రికార్డింగ్ చేస్తూ కనిపించారు.  దానితో రెచ్చి పోయిన ర్యాలీ మూకలు వాళ్ళ మీద కలియబడ్డారు.  ఈ ఉదంతాన్ని బ్లాక్ డెవలప్ మెంట్ ఆఫీసర్ దర్యాప్తు చేస్తున్నారు. 

పోలీసులకైతే ఎటువంటి ఫిర్యాదులూ అందలేదని అన్నారు. 

ఎన్నికల కమిషన్ కి తృణమూల్ కాంగ్రెస్ కి మధ్య ఈ మధ్య ఘర్షణ ఏర్పడటానికి కారణం పశ్చిమ బెంగాల్ లో కొందరు పోలీసు అధికారులను కొందరు మేజిస్ట్రేట్లను బదిలీ చెయ్యమని ఇసి పట్టుబట్టటమే. 

-శ్రీజ