అందరం వచ్చే సంవత్సరం సీమాంధ్రకు వెళ్దాం : బాబు

Posted: 05/28/2014 09:01 AM IST

తెలుగుదేశం పార్టీ అధినేత నారా చంద్రబాబు నాయుడు.. కొత్త నిర్ణయం తీసుకున్నారు. ఈ ఏడాది ఇక్కడే ఉండాలి.. వచ్చే ఏడాది మాత్రం సీమాంద్రకు వెళ్లాటానికి ప్రణాళిక సిద్దం చేస్తున్నారు. కొత్త రాజధానికి పయనం ప్రస్తుత విద్యా సంవత్సరం ముగిసిన తరువాతే. ఈలోగా రాజధాని నిర్మాణం పూర్తికి మొగ్గు చూపాలని కొత్త రాష్ట్ర ముఖ్యమంత్రి చంద్రబాబు యోచిస్తున్నట్టు సమాచారం.

ఇదే అంశాన్ని కొంతమంది సీమాంధ్ర ఉద్యోగులకూ చంద్రబాబు స్పష్టం చేసినట్టు తెలిసింది. వాస్తవంగా ఆరు నెలల్లోనే కొత్త రాజధానికి సచివాలయం సహా వెళ్లిపోవాలన్నది చంద్రబాబు ఆలోచన. దీనికోసం సాధ్యాసాధ్యాలనూ పరిశీలించాలని అధికారులకూ ఇటీవల సూచించారు. ముందుగా మంగళగిరి వద్ద తాత్కాలిక క్యాంప్ ఆఫీసు ఏర్పాటు చేసుకుని, తరువాతి కాలంలో పూర్తిస్థాయిలో వెళ్లిపోవాలని నిర్ణయించుకున్నారు.

అయితే ఇదే సమయంలో కొంతమంది ఉద్యోగులు చంద్రబాబును కలిసి పిల్లల విద్యా సంవత్సరం దెబ్బ తినకుండా ఉండేందుకు ఈ విద్యా సంవత్సరం ముగిసిన తరువాతే కొత్త రాజధానికి తరలివెళ్తే బాగుంటుందన్న అభిప్రాయాన్ని వ్యక్తం చేశారు. దీనివల్ల పిల్లల చదువుకూ అడ్డంకులు ఉండబోవని బాబు దృష్టికి తీసుకెళ్లారు.

ఈ నేపథ్యంలో చంద్రబాబు కూడా ఉద్యోగుల విజ్ఞప్తితో కొంతవరకు ఏకీభవించినట్టు సమాచారం. మార్చి, ఏప్రిల్ మాసాల్లో పరీక్షలు అయిన తరువాత రాజధానికి వెళ్లేలా చూడాలని కూడా బాబు భావిస్తున్నట్టు సమాచారం. అప్పటిలోగా కొత్త రాజధానిని గుర్తించడం, సచివాలయం, శాసనసభ, శాసనమండలి నిర్మాణాలను పూర్తి చేయడం, అధికారులు, ఉద్యోగులకు వసతి సౌకర్యాలు కల్పించేలా చూడడంవంటి అంశాలపై దృష్టి సారించాలని భావిస్తున్నారు. వీటికి సంబంధించి అన్ని చర్యలూ తీసుకోవాలని అధికారులకూ దిశా నిర్దేశం చేస్తున్నారు.

RS