మోదీ మీద మాట్లాడే ముఖపుస్తకం

Posted: 07/01/2014 02:43 PM IST

Facebook coo sheryl sandberg on indian economy

మోదీ మీద ఎందరో అపార నమ్మకాన్ని వ్యక్తం చేసారు. ఎన్నికలకు సంవత్సరం ముందు నుంచే సర్వే ఫలితాలను వీక్షించిన అమెరికా రద్దైన మోదీ వీసా విషయంలో చాలా జాగ్రత్తగా వ్యవహరించింది. మోదీ ప్రధానమంత్రిగా అధికారాలు చేపట్టిన తర్వాత ఆయనకు ఎన్నో దేశాల నుంచీ శుభాకాంక్షలతో పాటు ప్రశంసలు కూడా వచ్చాయి.

ఇక ఇప్పడు ప్రశంసలు పాతబడిపోయాయి. ఇంకా ఎన్ని వింటాములే అనిపిస్తుంది. కానీ ప్రముఖ సంస్థ చేసిన వ్యాఖ్యను విస్మరించలేము కదా.

ప్రపంచవ్యాప్తంగా ప్రాబల్యాన్ని సంపాదించుకున్న ఫేస్ బుక్ (దాన్నే తెలుగులో ముఖపుస్తకం అని పైన రాయటం జరిగింది) ఛీఫ్ ఆపరేటింగ్ ఆఫీసర్ షెరైల్ శాండ్బెర్గ్ భారత దేశ ప్రస్తుత పరిస్థితి గురించి మాట్లాడుతూ, ప్రపంచంలోనే అతి పెద్ద ఆర్థిక వ్యవస్థగల దేశంగా రూపొందుతుందని అన్నారు.

120 లక్షల కోట్ల ఆర్థిక వ్యవస్థతో, లఘు, మధ్యతరగతి వ్యాపారాలు ఎక్కువగా గల భారతదేశం ఉపాధి కల్పనలోను, ఆర్థికాభివృద్ధిలోను ముందంజవేస్తుందని, అమెరికా తో సహా చాలా దేశాలలో నిరుద్యోగ సమస్య ప్రబలిపోతున్న నేపథ్యంలో భారత్ లో అభివృద్ధి చెందుతున్న లఘు, మధ్యతరగతి వ్యాపారం వలన ఇంటర్నెట్ ఉపయోగాన్ని పెంచుకోవటం ద్వారా ఎక్కువమంది వినియోగదారులను సంపాదించుకుని తద్వారా ఆర్థికంగా బలపడటానికి అవకాశం ఉందని ఆమె అన్నారు. భారతదేశంలోని ఉత్పాదనల్లో 40 శాతం, 45 శాతం ఎగుమతుల్లోను లఘు మధ్యతరగతి వ్యాపారాల వాటా ఉందని ఆమె అన్నారు.

అంతేకాదు, భారతదేశంలో ఫేస్ బుక్ వాడకం ప్రపంచస్థాయిలో రెండవ స్థానంలో ఉందని, అందువలన భారత్ కి ఎక్కువ ప్రాధాన్యతనిస్తామని కూడా ఫేస్ బుక్ తరఫున షెరైల్ శాండ్బెర్గ్ అన్నారు. 200 మిలియన్ యూజర్లతో భారతదేశంలో ప్రపంచంలో ఇంటర్నెట్ వాడకందార్లలో మూడో స్థానంలో ఉన్నదని కూడా ఆమె చెప్పారు.

భారతదేశంలో ఆర్థికాభివృద్ధి రేటు ప్రపంచంలో ప్రథమ స్థానంలో ఉండేదని, కానీ గత రెండు సంవత్సరాలుగా అది పడిపోయిందని. అయితే మోదీ ప్రభుత్వంలో మళ్ళీ పుంజుకుంటుందన్న ఆశాభావాన్ని కూడా ఆమె వ్యక్తం చేసారు.

-శ్రీజ