మన్మోహన్ సింగ్ కి స్కామ్ లు చుట్టుకుంటాయా?

Posted: 07/03/2014 02:52 PM IST

మాజీ ప్రధాన మంత్రి మన్మోహన్ సింగ్ మెడకు కొన్ని స్కాములు చుట్టుకునే అవకాశాలు దండిగానే కనిపిస్తున్నాయి.

అందులో ప్రముఖంగా యుపిఏ ప్రభుత్వంలో బయటపడ్డ అతిపెద్ద స్కామ్ 2జి స్కామ్.  2జి నియామకాల సమయంలో ప్రధాన నిందితుడు టెలికాం మంత్రిగా పనిచేసిన ఏ రాజా నోరు విప్పిన దగ్గర్నుంచీ విషయాలన్నీ మన్మోహన్ సింగ్ దృష్టికి తీసుకునివెళ్ళినవేనని చెప్పటమే కాదు తనకేం సంబంధం లేదంటూ చెప్తూవచ్చారు.  

దీని ప్రభావం మన్మోహన్ సింగ్ ప్రధానిగా ఉన్న సమయంలో పడలేదు కానీ ఇప్పుడాయన అధికారంలో లేరు కాబట్టి ఆయన మీద విచారణ సాగించటానికి సిబిఐకి కాని, కోర్టులకు కాని ఎటువంటి ఇబ్బందులూ తలెత్తవు.  

మరో స్కామ్ బొగ్గు కేటాయింపులు.  

ఆడిటర్ జనరల్ ఆఫ్ ఇండియా మార్చి 2012లో ఇచ్చిన నివేదిక ప్రకారం 2004-2009 కి బొగ్గు నిల్వల కేటాయింపులలో అవకతవకలు జరిగాయని పేర్కొంది.  అప్పడు దానికి ఇన్ ఛార్జ్ ప్రధానమంత్రి మన్మోహన్ సింగ్.  దీనిమీద భారతీయ జనతా పార్టీ సిబిఐ దర్యాప్తుని డిమాండ్ చేసింది.  సిబిఐ దర్యాప్తైతే మొదలైంది కానీ మన్మోహన్ సింగ్ ని ఇందులోంచి బయటపడేయటం కోసం ప్రధానమంత్రి కార్యాలయం, గవర్నమెంట్ సొలిసిటర్ జనరల్ సిబిఐ దర్యాప్తులో కల్పించుకోవటం, సిబిఐ నివేదికను తమకు అనుకూలంగా మార్చుకోవటానికి ప్రయత్నించటాన్ని అప్పటి సిబిఐ డైరెక్టర్ రంజిత్ సిన్హా సుప్రీం కోర్ట్ కి తెలియజేసారు.  ఆ తర్వాత బొగ్గు కేటాయింపులకు సంబంధించి ఫైళ్ళు ప్రధానమంత్రి కార్యాలయం నుంచి కనపడకుండా పోవటం కూడా జరిగింది.  

ప్రస్తుతం మన్మోహన్ కి కాపుకాయటానికి కాంగ్రెస్ ప్రభుత్వం కూడా అధికారంలో లేకపోవటం వలన ఆయన ఈ స్కామ్ లో కూడా ఇరుక్కునే పరిస్థితి కనిపిస్తోంది.

-శ్రీజ