కేసీఆర్ సెంటిమెంట్ నెంబర్ ఏంటో తెలుసా....?

Posted: 10/28/2014 07:57 AM IST

సెంటిమెంట్ల గురించి పెద్దగా చెప్పనక్కర్లేదు. ప్రతి ఒక్కరికి ఏదో ఒకటి సెంటిమెంట్ గా ఉంటుంది. ఇక ప్రముఖుల సెంటిమెంట్లు, లక్కీ నంబర్ల గురించి ఆరా తీయగా ఓ ఆసక్తికర విషయం తెలిసింది.
సెంటిమెంట్లను కాస్త ఎక్కువగానే ఫాలో అయ్యే తెలంగాణ ముఖ్యమంత్రి కేసీఆర్ అదృష్ఠ సంఖ్యల అన్ని పనులు చేస్తారట. ఇంతకీ ఆయన లక్కీగా భావించే నంబర్ ‘6’ అట. ఇది ఆయన సన్నిహితులు, ముఖ్యమంత్రి వ్యవహారాలను దగ్గరినుంచి విశ్లేషించిన వ్యక్తులు చెప్తున్న మాటలు.

కేసీఆర్ చేసే ప్రతి పనిలో ఆరు నంబర్ కు ప్రాధాన్యం ఉండేట్లుగా వ్యవహరిస్తారు. ఉదాహరణకు కేసీఆర్ కాన్వాయ్ నంబర్ చివర్లో 6666 ఉంటుంది. ఇందులో అన్నీ 6 నంబర్లే ఉన్నాయి. వీటిని కలిపినా కూడా చివరకు ఆరే వస్తుంది (6+6+6+6=24.. 2+4=6). అంతేకాదు ఈనెల 24 (2+4=6) జరిగిన కేబినెట్ సమావేశం కూడా 6 కలిసి వచ్చే విధంగా ఉంది. ఇక కేబినెట్ సమావేశంకు ముఖ్యమంత్రి హాజరైన సమయం చూస్తే సాయంత్రం గం. 6.45 ఇది కూడా చివరకు ఆరు(6+4+5=15.. 1+5=6)గా వస్తుంది.

ఇలా చాలా వరకు కేసీఆర్ ఆరు నంబర్ ను ఫాలో అవుతున్నారు. దీన్నే ఆయన అభిమానులు కేసీఆర్ సిక్త్స్ సెన్స్ అని చెప్తున్నారు. అయితే అతి కీలకమైన ముఖ్యమంత్రి పదవిని మాత్రం జూన్ 2న చేపట్టారు. ఇందులో ఆరవ నెల ఉన్నా.. ఆరవ తేదీ మాత్రం లేదు. మరి ఇందులో ఏం మతలబు ఉందో ముఖ్యమంత్రికే తెలియాలి. సెంటిమెంట్లను ఎవరూ కాదనలేరు, నొప్పించలేరు. ఎవరి ఇష్టాలు, మనోభావాలు వారి వ్యక్తిగతం. కాని వాటివ్ల ఇతరులు ఇబ్బంది పడకుండా చూసుకోవటం అవసరం.

 

కార్తిక్