పీవీ నరసింహారావుకు అత్యున్నత పురస్కారం ఇవ్వాల్సిందే..

Posted: 12/24/2014 09:05 PM IST

మాజీ ప్రధాని వాజ్పేయి, స్వాతంత్ర్య సమరయోధుడు మదన్ మోహన్ మాలవ్యలకు భారతరత్న అవార్డు ప్రకటించడం పట్ల తెలంగాణ ముఖ్యమంత్రి కేసీఆర్ హర్షం వ్యక్తం చేశారు. దేశానికి వారు చేసిన సేవలను ఈ సందర్భంగా ఆయన గుర్తు చేశారు. మహనీయులను మర్చిపోకుండా దేశ అత్యున్నత పురస్కారాలను ఇచ్చి గౌరవించడం సమంజమన్నారు. కాగా తెలంగాణ రాజకీయ దురంధరుడు, మాజీ ప్రధాని పీవీ నరసింహరావుకు భారతరత్న ఇవ్వకపోవటం వెలితిగా ఉందని  కేసీఆర్ వ్యాఖ్యానించారు.

పీవీకి భారతరత్న ఇచ్చేందుకు అన్ని అర్హతలు ఉన్నాయని బుధవారం పేర్కొన్నారు. ఆయనకు కూడా భారతరత్న ఇవ్వాల్సిందన్నారు. కాగా తెలంగాణ అసెంబ్లీలో పీవీ నరసింహరావుకు భారతరత్న ఇవ్వాలంటూ తీర్మానం చేసి కేంద్రానికి పంపిన విషయం తెలిసిందే. అయితే తెలంగాణ ప్రభుత్వ డిమాండ్ ను బీజేపి నేత సుబ్రహ్మణ్య స్వామీ కూడా స్వాగతించారు. పివీ నరసింహారావు తీసుకువచ్చిన ఆర్థిక సంస్కరణలు దేశ దశదిశను మార్చాయని అభిప్రాయపడ్డారు. పీవీ ఆర్థిక సంస్కరణ ఫలితంగానే దేశం ఆర్థకంగా సుస్థిరంగా వుందని సుబ్రహ్మణ్య స్వామి కోనియాడారు.

జి. మనోహర్