ఎన్నాళ్లకెన్నాళ్లకు.. వంగ‘పండుగ’

Posted: 02/05/2015 08:44 AM IST

ఎం పిల్లో ఎల్దామోస్తవా..? ఎం పిల్లడో ఎల్దామోస్తవా..? అనే పాట గుర్తుందా..? మగధీర చిత్రంలో ఈ ట్యూన్ వాడిడంతోనే అప్పటివరకు నిగూఢంగా వున్న విప్లవ వాగ్గేయకారుడు లేచాడు. తన ట్యూన్ ను ఎలా వాడతారని అభ్యంతరం తెలిపాడు. ఆ తరువాత రాష్ట్ర విభజన క్రమంలో సమైక్యాంధ్ర ఉద్యమానికి పాటలు రచించి పాడి నవ్యాంధ్ర ప్రజల ఆదరాభిమానాలను చూరగొన్నాడు. అతనే వంగపండు ప్రసాదరావు. ఇంటిపేరు వంగపండుగా ఆయన చాలా పేరొందారు. తన రచనలకు ఆయన తన ఇంటిపేరునే పెట్టారు. ఇంతకీ ఇదంతా ఎందుకు చెబుతున్నామంటారా..? ఎట్టకేలకు ఆయనలోని కళా హృదయాన్ని ప్రభుత్వం గుర్తించింది.

నవ్యాంధ్రప్రదేశ్ తెలుగు సంస్కృతి, జానపద సంఘాలకు గౌరవ అధ్యక్షునిగా తనను నియమించినట్లు ప్రముఖ జానపద, విప్లవ వాగ్గేయకారుడు వంగపండు ప్రసాదరావు తెలిపారు. పార్వతీపురంలోని తన నివాసంలో ఆయన మీడియాతో మాట్లాడారు. అధ్యక్షునిగా తెలుగు విభాగ నాయకులు, డిప్యూటీ స్పీకర్ మండలి బుద్ధప్రసాద్, కార్యదర్శిగా పుంగనూరు నటరాజ్, కోశాధికారిగా వసంత నాగేశ్వరరావులు వ్యవహరిస్తారన్నారు. నవ్యాంధ్రప్రదేశ్ ఏర్పడిన సందర్భంగా విజయవాడలోని ఘంటసాల సంగీత ప్రాంగణంలో ఏప్రిల్ 26, 27, 28 తేదీల్లో తెలుగు భాషా సాంస్కృతిక, జానపద మహాసభలు నిర్వహించనున్నట్టు తెలిపారు.

జి.మనోహర్