బంగారు అక్షరాల ఆహ్వాన పత్రిక

Posted: 02/19/2015 10:20 AM IST

మైసూరు రాజుగా బాధ్యతలు స్వీకరించనున్న యదువీర్ గోపాలరాజ అరసు దత్తత స్వీకార మహోత్సవానికి బంగారంతో అక్షరాలు పొదిగిన ఆహ్వాన పత్రికను సిద్ధం చేశారు. ఒక్కో ఆహ్వాన పత్రికకు 20 వేల రూపాయలకు పైగా ఖర్చు పెట్టినట్లు సమాచారం. ఎంపిక చేసిన బంధువులు, శ్రేయోభిలాషులు, ప్రముఖులకు మాత్రమే ఈ ఆహ్వానం పంపనున్నారు. ఈ నెల 23న ఉదయం ఆరు నుంచి సాయంత్రం ఆరు గంటల వరకు మైసూరు ప్యాలెస్‌లో సంప్రదాయ ప్రకారం దత్తత స్వీకార మహోత్సవం నిర్వహించనున్నారు.
 
మైసూర్ సంస్థానం చివరి రాజైన శ్రీకంఠదత్త నరసింహరాజ వడయార్ కు పిల్లలు లేకపోవడంతో రాజవంశానికి చెందిన యదువీర్ ను దత్తత తీసుకుంటున్నారు. యదువీర్ ప్రస్తుతం అమెరికాలోని బాస్టన్ విశ్వవిద్యాలయంలో ఆర్థిక శాస్త్రాన్ని  అభ్యసిస్తున్నారు. దత్తత స్వీకారానంతరం ఆయన వారం రోజుల పాటు మైసూరులో ఉంటారు. స్వతంత్రానికి ముందు దాదాపు 550 సంవత్సరాల పాటు వడయార్ వంశస్థులు మైసూర్ ను పాలించారు. మైసూర్ లో జరిగే దసరా వేడుకలు ఎంతో ప్రసిద్ది. ఇప్పటికీ కర్నాటకలో మైసూర్ రాజులంటే ప్రజలకు ఎంతో అభిమానం ఉంది. అయితే ముందు నుండి రాజుల కుటుంబం కాబట్టి సందకు కొదవలేదు. ప్రపంచవ్యాప్తంగా తమ వంశానికి చెందిన వారసుడి గురించి తెలియడానికి ఇలా బంగారు అక్షరాలతో కూడిన ఆహ్వాన పత్రికను మైసూర్ వంశస్తులు ఇవ్వనున్నారు. ప్రస్తుతం ఇది మీడియాలో హాట్ టాపిక్ గా మారింది. పత్రికే బంగారంతో కూడిందంటే, మరి అసలు కార్యక్రమాన్ని ఎంత రంగరంగవైభవంగా నిర్వహిస్తారో చూడాలి.