ITEMVIDEOS: వైద్యుడిపై ‘చేతివాటం’ చూపించిన సింగర్ మికా

Posted: 04/13/2015 01:44 PM IST

Singer mika singh slaps a doctor while performing at a delhi concert

కాస్త ఇమేజ్ వస్తే చాలు.. కొందరు తారలకు పైత్యం ముదిరి కావాలనే వివాదాలు కొనితెచ్చుకుంటారు. తాము చేస్తున్నది తప్పని తెలిసినప్పటికీ.. వార్తల్లో నిలిచేందుకు ఆ పనిని కావాలనే చేస్తారు. అలాంటివారిల్లో సింగర్ మికా సింగ్ ఎప్పుడూ ముందుంటారని చెప్పుకోవడంలో ఎటువంటి అతిశయోక్తి లేదు. వివాదాలకు కేరాఫ్ అడ్రస్ గా మారిన ఈ పంజాబీ సింగర్.. తాజాగా మరో కొత్త కాంట్రోవర్సీలో చిక్కుకున్నాడు. ఇతగాడు ఓ వైద్యుడి చెంపలు పటాపంచలు చేశాడని పోలీసులు కేసు నమోదు చేశారు.

వివరాల్లోకి వెళ్తే.. ఢిల్లీ ఆప్తామాలజికల్ సొసైటీ వారు ఢిల్లీ పుసా ఇన్స్టిట్యూట్ మేలా గ్రౌండ్లో మూడు రోజులపాటు ఓ సదస్సును నిర్వహించారు. చివరిరోజున ప్రత్యేక ఆకర్షణ కోసం వారు సింగర్ మికాను ముఖ్య అతిథిగా ఆహ్వానించి... అతనితో కచేరీ కార్యక్రమాన్ని ఏర్పాటు చేశారు. ఇందులో భాగంగా ఈ లైవ్ కాన్సర్ట్ ముగిసే సమయంలో తాను చెప్పినట్లు చేసేందుకు మికాసింగ్ ఆడియెన్స్ నుంచి ఒకరిని స్టేజ్ మీదకు పిలిచాడు. అప్పుడు స్టేజ్ మీదకు అంబేద్కర్ ఆస్పత్రిలో కంటి వైద్యుడిగా పనిచేస్తున్న శ్రీకాంత్ అనే వ్యక్తి వచ్చాడు. డయాస్ పై వారిమధ్య ఏం జరిగిందో ఏమో తెలీదుగానీ.. మికా సింగ్ ఆ డాక్టర్ చంపలు వాయించి, అతనిని బౌన్సర్లకు అప్పగించాడు. వారు కూడా అతడిపై దాడి చేయడంతో అతడి ఎడమ చెవికి గాయాలవడంతోపాటు, శరీర అంతర్భాగాలకు కూడా గాయాలయ్యాయి.

ఈ మేరకు బాధితుడు ఫిర్యాదు చేయడంతో పోలీసులు కేసు నమోదు చేశారు. అయితే.. ఆ డాక్టర్ అనుచితంగా ప్రవర్తించడం వల్లే తాను అతనిపై చేయి చేసుకున్నానంటూ మికా పేర్కొంటున్నాడు. అటు మికా చేసిన ఈ తెలివితక్కువ పనిపై కొందరు డాక్టర్లు ఆగ్రహం వ్యక్తం చేస్తున్నారు. అతడిపై కఠిన చర్యలు తీసుకోవాల్సిందిగా డిమాండ్ చేస్తున్నారు. ఇదిలావుండగా.. మికా డాక్టర్ను కొట్టిన వీడియో ఇప్పుడు యూట్యూబ్తోపాటు పలు సైట్లలో హల్చల్ చేస్తోంది. గతంలో కూడా మికా ఇలాగే ఓ అభిమానిని కొట్టిన విషయం తెలిసిందే!