క్రికెట్ బంతే.. యమపాశమై పసి ప్రాణం తీసింది

Posted: 04/24/2015 01:37 PM IST

హైదరాబాద్ నగరంలోని విషాదం చోటు చేసుకుంది. క్రికెట్‌ మరొకరి ప్రాణం బలిగొంది. క్రికెట్ ఆడుతుండగా బంతి తగిలి గాయపడి నాలుగున్నరేళ్ల బాలుడు మృతి చెందాడు. హైదరాబాద్‌ వనస్థలిపురానికి చెందిన సహారా ఎస్టేట్స్‌లో ఈ ఘటన చోటుచేసుకుంది. ఈ ఘటనలో ఆరేళ్ల చిన్నారి వంశీకృష్ణ మృతి చెందాడు. వేసవి సెలవులు కావడంతో నిన్న సాయంత్రం స్నేహితులతో కలసి క్రికెట్‌ ఆడుతున్నారు. ఈ క్రమంలో ఓ బాలుడు వేసిన బంతి వంశీకృష్ణ ఛాతికి బలంగా తగడలడంతో అక్కడే కుప్పకూలిపోయాడు. వెంటనే తల్లిదండ్రులు వంశీకృష్ణను ఆస్పత్రికి తరలించారు. అయితే అప్పటికే బాలుడు చనిపోయాడని వైద్యులు చెప్పడంతో తల్లిదండ్రులు కన్నీరుమున్నీరుగా విలపించారు.

సమాచారం అందిన వెంటనే పోలీసులు అక్కడకు చేరుకుని బాలుడి మృతదేహాన్ని పోస్టుమార్టంకు తరలించారు. వంశీకృష్ణ నాగార్జున మాంటెస్సరీ స్కూల్లో యూకేజీ చదువుతున్నాడు. అతడికి తమ్ముడు, చెల్లెలు ఉన్నారు. వంశీకృష్ణ మృతితో వనస్థలిపురం సహారా ఎస్టేట్స్‌లో విషాదఛాయలు అలుముకున్నాయి. తల్లిదండ్రులు కన్నీరుమున్నీరవుతున్నారు. మరోవైపు పోలీసులు ఈ ఘటనపై కేసు నమోదు చేశారు.

జి. మనోహర్