పరివార్ ను వీడి హస్తంతో దోస్తీ.. రాహుల్ తో నితీష్ భేటీ..

Posted: 06/07/2015 01:25 PM IST

బిహార్ ముఖ్యమంత్రి నితీశ్ కుమార్ ఆదివారం కాంగ్రెస్ యువనేత, ఏఐసిసి ఉపాధ్యక్షుడు రాహుల్ గాంధీని కలిశారు. ఢిల్లీలోని రాహుల్ గాంధీ నివాసానికి చేరుకున్న ఆయన రాహుల్ తో సుమారు గంట పాటు చర్చలు జరిపారు. మరో మూడు, నాలుగు మాసాల్లో బిహార్ అసెంబ్లీకి జరగనున్న శాసనసభ ఎన్నికల్లో కాంగ్రెస్, జేడీ(యూ) పొత్తుకు గల అవకాశాలపై ఇరువురు నేతలు చర్చించినట్టు సమాచారం. జేడీ(యూ) జాతీయ అధ్యక్షుడు శరద్ యాదవ్ కూడా నితీశ్ తో చర్చలు జరిపారు. జనతా పరివార్ మహా కూటమిపై వీరు చర్చలు జరిపినట్టు సమాచారం.

బిహార్ లో ప్రస్తుతం జేడీ(యూ) ప్రభుత్వానికి కాంగ్రెస్ మద్దతు ఇస్తోంది. అయితే బిహార్ కాంగ్రెస్ నాయకులు పదేపదే ముఖ్యమంత్రి నితీశ్ కుమార్ పై ఫిర్యాదు చేస్తున్నారు. రానున్న ఎన్నికల్లో తమకు తగిన గౌరవం ఇస్తేనే మద్దతు ఇస్తామని చెబుతున్నారు. ఈ పరిణామాల నేపథ్యంలో రాహుల్ గాంధీతో నితీశ్ భేటీ ప్రాధాన్యం సంతరించుకుంది. ఇరు పార్టీల మధ్య పోత్తు కుదిరే అవకాశాలకు ఇరువురు నేతలు సూత్రప్రాయంగా అంగీకారినికి వచ్చినట్లు సమాచారం.

జి.మనోహర్