అమితాబ్, అభిషేకల్ ల గొంతుకు చుట్టుకున్న ‘పతాకం’!

Posted: 06/18/2015 12:21 PM IST

బాలీవుడ్ బిగ్ బీ, ఆయన కుమారుడు-నటుడు అభిషేక్ బచ్చన్ ఇద్దరి గొంతులకు త్రివర్ణ పతాకం చుట్టుకుంది. తమ అభిమానం చాటేందుకు జాతీయ పతాకాలను తమ దేహాలకు వారు చుట్టుకోగా.. అది అటు-ఇటు తిరిగి చివరికీ వాళ్లకు గొంతులకు చిక్కుకోక తప్పలేదు. దీంతో కాస్త కోపాద్రిక్తుడైన చేతన్ ధిమాన్ అనే వ్కక్తి.. ఘజియాబాద్ జ్యుడిషియల్ మేజిస్ట్రేట్ కోర్టులో ఫిర్యాదు చేయగా వారిరువురిపై కేసు నమోదైంది.

వివరాల్లోకి వెళ్తే.. ఈ ఏడాది ఫిబ్రవరి 15వ తేదీన ఇండియా-పాకిస్థాన్ మధ్య జరిగిన ప్రపంచ కప్ క్రికెట్ మ్యాచ్ సమయంలో అమితాబ్, అభిషేక్ ఇద్దరూ జాతీయ జెండాను తమ దేహానికి కప్పుకున్నారు. ఇదే వారిద్దరిని ఇబ్బందుల్లో పడేసింది. జాతిని అవమానించే రీతిలో జాతీయ పతాకాన్ని వారి దేహాలకు కప్పుకున్నారన్న ఆరోపణతో చేతన్ ధిమాన్ కోర్టుకెక్కాడు. త్రివర్ణ పతాకాన్ని అవమానించే రీతిలో అమితాబ్ ధరించడం చేతన్ తోపాటు అతని స్నేహితులు కూడా చూశారని వారి తరఫున న్యాయవాది తెలిపాడు. అంతర్జాతీయంగా పేరున్న సినీస్టార్, ఆయన కుమారుడు ఇటువంటి చర్యలకు పాల్పడటం దేశ ఖ్యాతిని తగ్గించేందుకు పాల్పడినట్టేనని అన్నారు.

ఈ విధంగా జాతీయ జెండాను దేహాలకు కప్పుకోవడం వంటి చర్య ‘ప్రివెన్షన్ ఆఫ్ ఇన్ సల్ట్స్ టు నేషనల్ హానర్ యాక్ట్ 1971’, ‘ద ఫ్లాగ్ కోడ్ ఆఫ్ ఇండియా 2002’ కిందకు వస్తుందని.. ఈ విషయంలో వారిద్దరికీ తప్పకుండా సమన్ల జారీ చేస్తారని, విచారణకు ఖచ్చితంగా కోర్టు ఎదుట హాజరు కావాల్సి వుంటుందని తెలిపారు. మరి.. దీనిపై అమితాబ్, అభిషేక్ ల స్పందన ఎలా వుంటుందో వేచి చూడాల్సిందే!