ఫోన్ ట్యాపింగ్ వ్యవహరంపై నారా లోకేష్ తీవ్ర వ్యాఖ్యలు

Posted: 06/30/2015 11:07 PM IST

తెలుగు రాష్ట్రాల మధ్య కొద్ది రోజులుగా జరుగుతున్న ఓటుకు నోటు కేసు, ఫోన్ ట్యాపింగ్ వ్యవహారం ఎట్టకేలకు ట్విట్టర్ పిట్ట.. నేరుగా మీడియాతో కూసింది. ఈ వ్యవహరాలపై సుమారు నెల రోజుల తరువాత స్పందించిన టీడీపీ యువనేత నారా లోకేష్ పలు తెలంగాణ ముఖ్యమంత్రి కె. చంద్రశేఖర రావుపై తీవ్ర వ్యాఖ్యలు చేశారు. ఏదీ తెగే వరకు లాగకూడదన్నారు. నోటుకు ఓటు కేసులో నోటీసులు ఇచ్చినంత మాత్రాన బ్రహ్మాండం బద్దలై పోదని ఆయన వ్యాఖ్యానించారు. తెలంగాణ ప్రభుత్వానికి ఫోన్ ట్యాపింగ్ భయం పట్టుకుందని వ్యాఖ్యానించారు. అందితే జట్టు అందకపోతే కాళ్లు అనేది కెసిఆర్ తత్త్వమని ఆయన దుయ్యబట్టారు.ఫోన్‌ట్యాపింగ్‌ భయం లేకుంటే హోంశాఖ కార్యదర్శిని టీ సర్కార్‌ ఎందుకు మార్చిందని ప్రశ్నించారు. అంతేకాకుండా కేసును డీల్ చేస్తున్న ఇంటెలిజన్స్‌ చీఫ్‌ దీర్ఘాకాలిక సెలవుపై ఎందుకు వెళ్లారు అని లోకేష్‌  ప్రశ్నించారు.
 
 టీ సర్కార్‌ నోటీస్‌లు ఇస్తే తమ నెత్తిన పాలు పోసినట్లేనని ఆయన అన్నారు. నోటీసులు ఇవ్వాలనే మేం కూడా కోరుకుంటున్నామని చెప్పారు. గవర్నర్ రాష్ట్రపతికి ఇచ్చే విందుకు కేసీఆర్ గైర్హాజరు కావండంపై స్పందిస్తూ.. చంద్రబాబుకు ఎదురు పడలేకనే గవర్నర్‌ విందుకు కేసీఆర్‌ గైర్హాజరయ్యారని విమర్శించారు. నాలుగు రోజులు ఫాంహౌస్‌లో రెస్ట్‌ తీసుకున్న కేసీఆర్‌కు.. ఇప్పుడే జ్వరం వచ్చిందా అని ప్రశ్నించారు.రూ. వేల కోట్ల టర్నోవర్‌ ఉన్న హెరిటేజ్‌ను హైదరాబాద్ నుంచి వెళ్లగొట్టేందుకు టీ ప్రభుత్వం ప్రయత్నిస్తోందని, అందితే జుట్టు, అందకపోతే కాళ్లు పట్టుకునే రకం కేసీఆర్‌దని ఆరోపించారు. కేసీఆర్‌ వైఖరిని ప్రజలు గమనిస్తున్నారని నారా లోకేష్‌ అన్నారు.

జి.మనోహర్