తండ్రి కేసీఆర్ కేబినెట్ పై కూతురు కామెంట్?

Posted: 07/11/2015 10:18 AM IST

తెలంగాణ సీఎం కేసీఆర్ కేబినెట్ లో ఇంతవరకు మహిళలకు ప్రత్యేక ప్రాతినిధ్యమే లభించలేదు. దీంతో ఇప్పటికీ ఈ విషయంపై విపక్షాలతోపాటు ప్రజాసంఘాలు కూడా కేసీఆర్ మీద విమర్శలు గుప్పిస్తూనే వున్నాయి. మంత్రివర్గంలో మహిళలకూ చోటివ్వాలంటూ డిమాండ్ చేస్తున్నాయి. ఇక మాదిక రిజర్వేషన్ పోరాట సమితి (ఎమ్మార్పీఎస్) అధ్యక్షుడు అయితే.. ఏకంగా మహిళలతో భారీ నిరసన చేపట్టారు. ఇలా విమర్శించేవారి జాబితాలో తాజాగా ఆయన కూతురు, నిజామాబాద్ ఎంపీ కవిత కూడా చేరిపోయారు.

తెలంగాణ మంత్రివర్గంలో మహిళలకు ప్రాతినిధ్యం లేకపోవడం తనని కూడా చాలా బాధిస్తోందని పేర్కొన్న కవిత.. ఈ విషయంలో ప్రభుత్వాన్ని ప్రశ్నించేవారిలో తాను కూడా వున్నానని స్పష్టం చేసింది. హైదరాబాద్ లోని పార్క్ హయాత్ హోటల్ లో శుక్రవారం ఫిక్కి ఎఫ్ఎల్ఓ ఆధ్వర్యంలో జరిగిన ‘భవిస్యత్తు భారతంలో మహిళల ముందంజ’ అనే అంశంపై నిర్వహించిన సదస్సులో ముఖ్య అతిథిగా పేర్కొన్న ఆమె.. తన ప్రసంగంలో తండ్రి కేబినెట్ విషయాన్ని లేవనెత్తింది. ఆమె ప్రసంగిస్తున్న సమయంలో ఫిక్కి సభ్యురాలు ఒకరు కేబినెట్ లో మహిళలకు చోటు దక్కని విషయంపై కవితకు ప్రశ్న సంధించారు. అందుకు జవాబుగా ఆమె ‘అందుకు తనకూ బాధ కలిగిస్తోందని’ పేర్కొన్నారు.

గతంతో పోల్చుకుంటే ఇప్పుడున రాష్ట్రంలో సభ్యల సంఖ్య తక్కువగా వుందని, దీనికితోడు అన్ని సమీకరణాల నేపథ్యంలో అవకాశం దక్కలేదని కవిత చెప్పారు. అయితే.. మహిళలకు చోటు దక్కకపోవడం కొంచెం బాధాకరమైన విషయమేనని అన్నారు. ప్రస్తుతం మహిళలు కూడా అన్నిరంగాల్లో ముందంజలో వున్నారని తెలిపారు. చివరగా.. వివిధ సమీకరణాల నేపథ్యంలోనే కేబినెట్ లో మహిళలకు చోటు దక్కలేదని కవిత వెల్లడించారు.