మరో విద్యార్థి డెత్ మిస్టరీ.. ఆ యువకుడిపైనే ‘డౌట్’!

Posted: 08/11/2015 10:32 AM IST

Student mounika death mystery khammam district love affairs

గుంటూరులోని నాగార్జున యూనివర్సిటీ విద్యార్థిని రిషితేశ్వరి ఆత్మహత్య వివాదం ఇంకా చల్లారకముందే ఖమ్మం జిల్లా ఆస్పత్రిలో అనుమానాస్పద రీతిలో మృతి చెందిన డిగ్రీ విద్యార్థిని భూక్యా మౌనిక(19) మిస్టరీ కలకలం సృష్టిస్తోంది. జిల్లా మహిళా కాలేజీలో బీఏ ఫైనలియర్ చదువుతున్న ఈమె.. ఆదివారం తన ఊరికి వెళ్తున్నానని చెప్పి సాయంత్రం ఐదు గంటల సమయంలో జిల్లా ఆస్పత్రిలో శవమై కనిపించింది. ఈమె మృతదేహాన్ని ఇద్దరు ఆగంతుకులు తీసుకువచ్చి.. =ఒకరు మౌనిక తండ్రి రామచంద్రుకు ఫోన్‌చేసి ‘మీ అమ్మాయి ఉరి వేసుకుంది.. జిల్లా ఆస్పత్రిలో చేర్పించాం’ అని చెప్పి ఫోన్ స్విచ్ఛాఫ్ చేశాడు. అంతే.. అప్పటినుంచి ఆ ఇద్దరు కనిపించడం లేదు. దీంతో ఈమె మృతితో వారిద్దరికి సంబంధం వుంటుందన్న అనుమానంతో పోలీసులు దర్యాప్తు ప్రారంభించారు.

పారిపోయిన ఇద్దరు అగంతకుల కోసం పోలీసు ప్రత్యేక బృందాలు గాలింపు చర్యలు చేపట్టాయి. వారిలో ఒకరిని కూసుమంచి మండలం నాయకన్‌గూడెంకు చెందిన వ్యక్తిగా భావిస్తున్నారు. మౌనిక మృతి వెనుక ఆ అబ్బాయి హస్తం వుండవచ్చునని పోలీసులు అనుమానిస్తున్నారు. పైగా.. మౌనిక సెల్‌ఫోన్‌కు ‘నీ అంతు చూస్తా..’ అంటూ వచ్చిన ఓ మెసేజ్‌పైనా పోలీసులు దృష్టి సారించారు. మౌనిక తల్లిదండ్రులకు ఫోన్ చేసిన ఆ మెసేజ్ గురించి ఆరాతీయగా.. అది ఆ యువకుడి నంబర్ నుంచే వచ్చినట్టు గుర్తించారు. అదే నంబర్ నుంచి శనివారం రాత్రి మౌనిక సెల్‌కు దాదాపు 50 మిస్డ్ కాల్స్ రావడం గమనార్హం. మౌనికకు చెందిన ఒక నోట్‌పుస్తకంలో ఓ యువకుడి ఫొటోను పోలీసులు స్వాధీనం చేసుకున్నారు. ఆ యువకుడి ఫొటో.. మౌనికను ఆసుపత్రికి తీసుకువచ్చిన సందర్భంగా సీసీటీవీ కెమెరాల్లో కనిపించిన ఇద్దరు యువకుల్లో ఒకరిని పోలి ఉంది. దీంతో ఈ యువకుడికి మౌనిక మృతికి సంబంధం ఉన్నట్లు పోలీసులు భావిస్తున్నారు.

మరో ఆసక్తికరమైన విషయం ఏమిటంటే.. మౌనిక తరచుగా సెల్‌ఫోన్‌లో మాట్లాడుతూ ఓ యువకుడితో మాట్లాడుతూ ఉండేదని.. అప్పుడప్పుడు అతడు మామిళ్లగూడెంలో ఆమె ఉంటున్న స్వధార్‌హోంకు వచ్చేవాడని, అతడి పేరు రాము అని మౌనిక స్నేహితులు తెలిపారు. అయితే.. శనివారం సాయంత్రం ఓ యువకుడు మౌనికతో గొడవపడి చేయి కూడా చేసుకున్నాడని, ఆ యువకుడు ఎవరని అడిగితే మౌనిక రోదించింది తప్ప అతడి పేరు చెప్పలేదని వారు పేర్కొన్నారు. మరోవైపు.. కొంతకాలంగా ఓ యువకుడు తనను ప్రేమించమంటూ మౌనికపై వేధింపులకు పాల్పడుతున్నాడని పోలీసులకు తెలిసింది. ఆ యువకుడు సీసీటీవీ ఫుటేజీలో ఉన్నవాడే అయి ఉండొచ్చని వారు అనుమానిస్తున్నారు. వేధింపుల సంగతిని మౌనిక ఇటీవల ఆమె సోదరితో కూడా చెప్పి బాధపడినట్లు తెలిసింది. మొత్తానికి మౌనిక డెత్ మిస్టరీ ఇంకా సస్పెన్స్ గానే మిగిలింది.