సల్మాన్.. రియల్ లైఫ్ ‘బజరంగీ భాయిజాన్’?

Posted: 08/19/2015 06:22 PM IST

Salman khan reunites runaway kids real life bajrangi bhaijan

సల్మాన్ ఖాన్ నటించిన ‘బజరంగీ భాయిజాన్’ చిత్రం ఎంత భారీ విజయం సాధించిందో ప్రత్యేకంగా చెప్పుకోవాల్సిన అవసరం లేదు. ఇండియాలో తప్పిపోయిన ఓ పాకిస్థాన్ చిన్నారిని తిరిగి ఆమె స్వదేశంలోని కుటుంబంతో కలిపే కథాంశంతో తెరకెక్కిన ఆ చిత్రం.. సల్లూ భాయ్ కెరీర్ లోనే బిగ్గెస్ట్ హిట్ గా నిలిచింది.

ఈ సినిమా స్టోరీలైన్ నేపథ్యంలోనే రియల్ లైఫ్ లోనూ ఓ ఇన్సిడెంట్ చోటు చేసుకున్న సంగతి విదితమే! ఇండియాకి చెందిన ఓ అమ్మాయి పాకిస్థాన్ లో వుందని, ఆమెని ఇండియాకి తీసుకొచ్చే ప్రయత్నాలు జరుగుతున్నాయని కేంద్రప్రభుత్వం కూడా వెల్లడించింది. ఈ వ్యవహారంలో తాను కూడా సహాయం చేస్తానంటూ సల్లూభాయ్ ఆ మధ్యలో ప్రకటించాడు కూడా! దీంతో అతనికి రియల్ లైఫ్ ‘బజరంగీ భాయిజాన్’ అని అభిమానులు వర్ణించుకున్నారు. అప్పుడు అలా సహాయం చేస్తే.. ఇప్పుడు ఓ అడుగు ముందుకేసి, ‘బజరంగీ భాయిజాన్’గా అవతారమెత్తి, ఓ మంచి పని చేశాడు సల్లూ భాయ్!

ఇంటి నుంచి పారిపోయిన నలుగురు చిన్నారులను మళ్లీ వారి కుటుంబాలతో కలిపాడు సల్మాన్ ఖాన్. ఈ ప్రక్రియలో సల్మాన్ కు అంతర దేశాయ్ అనే సామాజిక కార్యకర్త కూడా సహాయపడ్డారు. మహారాష్ట్రలోని కర్జాత్ పట్టణంలో జరిగిన ఓ కార్యక్రమంలో ఆ చిన్నారులను తల్లిదండ్రులకు అప్పగించారు. ఇలాంటి కార్యక్రమాలే మరిన్ని చేపడతామని అంతర తెలిపారు. ఎంతోకాలంగా ఖర్చులన్నీ సల్మానే భరిస్తున్నారని, ఆయన నిజంగానే 'బజరంగీ భాయిజాన్' అని కొనియాడారు. మొత్తానికి ఆ చిత్రం సల్లూ కెరీర్ లో చాలా మార్పులే తీసుకొచ్చినట్లుంది.

AS