ITEMVIDEOS: మరో శ్రీమంతుడుగా మారిన ప్రకాశ్ రాజ్

Posted: 09/08/2015 08:04 AM IST

తెలుగు సినిమా వాళ్లు మనసున్న మారాజులు అని అందరికి తెలుసు. తాజాగా మహేష్ బాబు తీసిన శ్రీమంతుడు సినిమా తర్వాత ఏదైనా ఊరిని దత్తత తీసుకోవాలని మహేష్ బాబు అనుకోవడం ఆ తర్వాత ఏపిలో తన స్వంత గ్రామాన్ని, తెలంగాణలో మహబూబ్ నగర్ కు చెందిన మరోగ్రామాన్ని దత్తత తీసుకొని అందరికి ఆదర్శంగా నిలిచారు. అయితే ఇదే బాటలో మరికొంత మంది నటులు పయనిస్తున్నారు. తాజాగా విలక్షణ నటుడు ప్రకాశ్ రాజ్ కూడా ఓ గ్రామాన్ని దత్తత తీసుకోవడానికి ముందుకు వచ్చారు. తెలంగాణలోని ఓ గ్రామాన్ని దత్తత తీసుకోవాలని తాను అనుకుంటున్నానని, తెలంగాణ పంచాయితీరాజ్, ఐటీ శాఖ మంత్రి కేటీఆర్ కు వివరించారు.

మహబూబ్‌నగర్ జిల్లా కేశంపేట మండలంలోని కొండారెడ్డిపల్లి గ్రామాన్ని దత్తత తీసుకోవాలని భావిస్తున్నట్లు తెలియజేశారు. ప్రకాశ్‌రాజ్ ఫౌండేషన్ ద్వారా ఇప్పటికే కర్ణాటకలో చేస్తున్న పలు సేవా కార్యక్రమాల గురించి మంత్రికి వివరించారు. అదే విధంగా కొండారెడ్డిపల్లి గ్రామంలో కూడా అభివృద్ధి కార్యక్రమాలు చేపడుతానని తెలిపారు. కొండారెడ్డిపల్లెలో శాస్త్రీయ పద్ధతుల్లో వ్యవసాయం చేస్తున్నానని చెప్పారు. తాను నివసిస్తున్న గ్రామాన్ని దత్తత తీసుకొని అక్కడి రైతులకు సాయం అందించేందుకు, గ్రామంలో మౌలికవసతుల కల్పనకు ప్రభుత్వంతో కలిసి పనిచేస్తానని పేర్కొన్నారు. ఇప్పటికే తన సిబ్బంది క్షేత్రస్థాయిలో సర్వే నిర్వహిస్తున్నారని, అది ముగియగానే గ్రామంలో చేపట్టే పనుల వివరాలు వెల్లడిస్తానని ప్రకాశ్‌రాజ్ తెలిపారు. గ్రామాన్ని దత్తత తీసుకొనేందుకు ముందుకొచ్చిన ప్రకాశ్‌రాజ్‌ను మంత్రి కేటీఆర్ అభినందించారు. ప్రభుత్వం తరఫున పూర్తి సహకారం అందిస్తామన్న హామీ ఇచ్చారు.