బాబు కన్నా కేసీఆర్ ఎక్కువ తెస్తారా..?

Posted: 10/27/2015 11:15 AM IST

ఏపి సిఎం నారా చంద్రబాబు నాయుడుకు, మోదీకి ఉన్న అనుబంధం గురించి కొత్తగా చెప్పక్కర్లేదు. అమరావతి శంకుస్థాపన కార్యక్రమంలో మోదీ కూడా ఇదే మాట అన్నారు. చంద్రబాబుతో మా సంబందం చాలా బలంగా ఉందని అన్నారు. కాగా తాజాగా కేసీఆర్ హస్తినకు ప్రయాణమయ్యారు. మోదీతో సహా పలువురు కీలక నేతలను కలిసి.. తెలంగాణ రాష్ట్రం సమస్యల మీద వినతులు సమర్పించనున్నారు. అయితే ఏపి రాష్ట్రానికి అన్ని రకాలుగా సాయం చెయ్యడానికి కేంద్ర సిద్దంగా ఉందని చాలా సార్లు మోదీతో సహా చాలా మంది కేంద్ర మంత్రులు కూడా వెల్లడించారు. నేడు నీతి ఆయోగ్ సమావేశంలో పాల్గొనేందుకు ఢిల్లీ వెళ్లారు తెలంగాణ సీఎం కేసీఆర్. ఈ పర్యటనలో రాష్ట్రపతి ప్రణబ్ ముఖర్జీ, ప్రధాని నరేంద్రమోడీతోనూ భేటీ కానున్నారు. అటు..పలువురు కేంద్రమంత్రులను కలిసి రాష్ట్రానికి సంబంధించిన వివిధ అంశాలపై చర్చించనున్నారు.

ఢిల్లీ పర్యటనలో ఇవాళ బిజీబిజీగా గడపనున్నారు తెలంగాణ ముఖ్యమంత్రి కేసీఆర్. మధ్యాహ్నం 12 గంటలకు కేంద్ర ఆర్థిక శాఖ మంత్రి అరుణ్ జైట్లీతో సమావేశం కానున్నారాయన. ఈ భేటీలో కేంద్ర పథకాల్లో వాటా, సాయం పెంపు అంశంపై చర్చించనున్నారాయన. అలాగే..ఎఫ్ ఆర్ బీఎంను పెంచాలని కోరనున్నారు. అనంతరం రెండు గంటల ప్రాంతంలో కేంద్ర ఉపరితల రవాణాశాఖ మంత్రి నితిన్ గడ్కరీతోనూ భేటీ కానున్నారు సీఎం కేసీఆర్. ఈ సందర్భంగా రాష్ట్రంలో జాతీయ రహదారుల అభివృద్ధిపై చర్చిస్తారు. రాత్రి ఏడు గంటలకు ప్రధాని నరేంద్రమోడీ నేతృత్వంలో మధ్యప్రదేశ్ ముఖ్యమంత్రి, నీతి ఆయోగ్ సబ్ కమిటీ సభ్యులతో సమావేశమవుతారు కేసీర్. ఇక్కడే కేంద్ర ప్రభుత్వ పథకాలపై రూపొందించిన నివేదికను సీఎం కేసీఆర్ సమర్పించనున్నారు.