కట్టుకున్న భార్యను కాల్‌గార్ల్‌గా మార్చిన భర్త...

Posted: 10/27/2015 04:46 PM IST

అతడో సాఫ్ట్ వేర్ ఇంజనీర్.. పైగా పెళ్లికి ముందు ఎంతో మంచివాడిలా వ్యవహరించడంతో సమీప బంధువులు తమ అమ్మాయిని అతనికిచ్చి వివాహం జరిపించారు. ఆ అమ్మాయి కూడా సాఫ్ట్ వేర్ ఇంజనీర్ కావడంతో ఇద్దరూ ఉద్యోగాలు చేసుకుంటూ తమ సంసార జీవితాన్ని సంతోషంగా సాగిస్తూ వచ్చారు. ఇందుకు గుర్తుగా వారికి ఇద్దరు పిల్లలు కూడా వున్నారు. కానీ.. ఇంతలోనే భర్తలో దాగివున్న వున్న రాక్షసుడు మేలుకున్నాడు. మరో అమ్మాయిని వ్యామోహం పెంచుకున్న ఆ కర్కశుడు.. తన భార్యను వదిలించుకోవాలని ఓ పన్నాగం పన్నాడు. తన భార్యను వ్యభిచారిణిగా చిత్రీకరించే ప్రయత్నంలో ఆమె మొబైల్ నంబరును ఆన్‌లైన్ కాల్‌గర్ల్ జాబితాలో పెట్టాడు. చివరకు ఈ విషయం బయటకు పొక్కడంతో అతగాడు కటకటాల పాలయ్యాడు. పోలీసులు పక్కా ఆధారాలతో అరెస్టు చేసి జైలుకు పంపించారు. ఈ ఘటన హైదరాబాద్‌లో జరిగింది.

పోలీసులు తెలిపిన వివరాల ప్రకారం.. హైదరాబాద్ నగరానికి చెందిన మురళి - భాగ్యలక్ష్మి ఇద్దరూ సాఫ్ట్ వేర్ ఇంజనీర్లుగా స్థిరపడ్డారు. సమీప బంధువులు అయిన వారిద్దరికీ పెద్దలు అంగరంగ వైభవంగా పెళ్లి జరిపించారు. వీరికి ఇద్దరు పిల్లలు కూడా ఉన్నారు. అయితే.. ఇంతలోనే మురళి మరో అమ్మాయిపై వ్యామోహం పెంచుకున్నాడు. ఆమెకు మాయమాటలు చెప్పి తన ప్రేమవలలో పడేయడమే కాకుండా.. తన భార్య భాగ్యలక్ష్మికి తెలియకుండా ఆ యువతిని పెళ్లి చేసుకున్నాడు కూడా. కొద్దిరోజుల గడిచిన తర్వాత అతగాడికి మరో యువతిపై మోజుపడింది. ఇలా పలు అమ్మాయిలపై ఆ కర్కశుడు మోజు పెంచుకున్నాడు. ఈ క్రమంలో తన భార్య భాగ్యలక్ష్మిని వదిలించుకునేందుకు ఆమె మొబైల్ నంబరును ఆన్‌లైన్‌లో కాల్‌గర్ల్ లిస్టులో ఉంచాడు. దీంతో ఆమె ఫోన్ నంబరుకు అనేక మంది ఫోన్లు చేయడం ప్రారంభించారు. అదే సమయంలో భర్త, అత్త ఉమావతి నుంచి వేధింపులు ఎక్కువయ్యాయి.

ఓవైపు వరుసగా ఫోన్లు రావడం, మరోవైపు అత్తారింట్లో వేధింపులు పెరగడంతో తీవ్ర మనోవేదనకు గురైన భాగ్యలక్ష్మి.. తన దుస్థితిని అన్నకు వివరించింది. వారి సాయంతో హైదరాబాద్ సైబర్ క్రైమ్ పోలీసులకు ఫిర్యాదు చేసింది. దీనిపై కేసు నమోదు చేసిన పోలీసులు.. మొబైల్ నంబరును ఎవరు కాల్‌గర్ల్ జాబితాలో పెట్టోరో.. ఎక్కడ పెట్టారో ఐపీ అడ్రస్ ద్వారా ఆరా తీశారు. ఇందులో మురళీ వినియోగించే కంప్యూటర్ నుంచే అప్ చేసినట్టు పోలీసులు నిర్ధారించుకుని.. మురళిని అరెస్టు చేశారు. కేసు దర్యాప్తు జరుపుతున్నారు.

AS