ITEMVIDEOS: ఆ పాఠశాల విద్యార్థులకు.. యాపిల్ క్షమాపణలు

Posted: 11/12/2015 08:25 PM IST

Apple apologises after allegations of racism by australia schoolboys

వర్ణ వివక్ష అంతరించి పోయిందని గొప్పలు చెప్పుకునే పాశ్చాత్య దేశాల్లో నేటికీ అ జాడ్యం ఇంకా ప్రభలుతూనే వుందని చెప్పడానికి ఈ ఘటనే ఉదాహరణ. ఆస్ట్రేలియాలోని మెల్‌బోర్న్‌లో గల యాపిల్ స్టోర్‌లో జరిగిన ఘటన ఈ విషయాన్ని రుజువు చేస్తోంది. ఈ కంపెనీ ఆఫీసుకు ఆరుగురు నల్ల జాతీయులు వచ్చారు. వారందరూ టీనేజర్లు కావడంతో వారిని స్టోర్ నుంచి వెళ్లిపోవాలని సెక్యూరిటీగార్డు సూచించాడు. ఎందుకు వెళ్లిపోవాలని ప్రశ్నిస్తే.. 15 నుంచి 16 సంవత్సరాల నల్ల జాతీయులు ఏదైనా దొంగిలిస్తారేమోనన్న అనుమానంతో రానివ్వమని సెక్యూరిటీ తెలిపాడు.

ఈ ఘటనపై తీవ్ర విచారం వ్యక్తం చేసిన నల్లజాతి యువకులు ఘటననంతా వీడియో తీశారు. ఆ వీడియో ఇప్పుడు సోషల్ మీడియాలో హల్‌చల్ చేస్తోంది. 'సింపుల్ రేసిజం' అనే టైటిల్ తో ఫేస్ బుక్ లో పెట్టగా దానిని ఇప్పటికే 60,000మందికి పైగా చూశారు. దీంతో ఎట్టకేలకు ఈ ఘటనపై యాపిల్ కంపెనీ యాజమాన్యం స్పందించింది. తమ స్టోర్లోకి వచ్చిన ఆరుగురు ఆఫ్రికా విద్యార్థులను బయటకు గెంటేసిన ఘటనపై ఆపిల్ సంస్థ క్షమాపణలు చెప్పింది.

తమ సిబ్బంది చేసిన పొరపాటుకు చింతిస్తున్నామని, ఈ విషయంలో క్షమించాలని కోరింది. ప్రతి వినియోగదారుడు తమకు సమానమేనని పేర్కోంది. అయితే, స్టోర్ యాజమాన్యం క్షమాపణలు చెప్పిన తర్వాత తిరిగి ఆ విద్యార్థులు బుధవారం షాపింగ్ కు వెళ్లారు. ఇలా ఒక్క ఐ ఫోన్ స్టోర్లే కాదు.. వారు ఎక్కడికి వెళ్లినా దాదాపుగా తమ ఆఫ్రికన్లపట్ల జాతివివక్ష చూపిస్తారని పలువురు ఆవేదన వ్యక్తం చేస్తున్నారు.

జి. మనోహర్