ఢిల్లీలో మరో దారుణం.. కజిన్ ను చంపి బాలికపై రేప్

Posted: 11/16/2015 11:57 AM IST

Raju brutally raped a minor girl also killed her cousin brother in delhi

దేశ రాజధాని ఢిల్లీ నగరంలో మహిళలపై జరుగుతున్న ఆకృత్యాలు ఏమాత్రం తగ్గుముఖం పట్టడం లేదు. రోజురోజుకీ ఈ దారుణాల సంఖ్య మరింత పెరుగుతూనే వుంది. చిన్న బాలికల నుంచి ముసలివారు దాకా ఎవరు ఒంటరిగా కనిపించిన.. కామాంధులు వారిపై మృగాళ్ల విరుచుకుపడుతున్నారు. ఇప్పుడు మరో ఘోరం వెలుగుచూసింది. ఓ బాలిక(17)పై గతకొన్నాళ్ల నుంచి కన్నేసిన ఓ దుర్మార్గుడు.. ఆమె ఇంట్లో తన సోదరులతో వున్న విషయాన్ని తెలుసుకుని అత్యాచారానికి పాల్పడ్డాడు. అంతటితో ఆగకుండా ఆమె కజిన్ ని అత్యంత దారుణంగా చంపేశాడు. అనంతరం ఆ నిందితుడు అక్కడి నుంచి పరారయ్యాడు. వాయవ్య ఢిల్లీలోని స్వరూప్‌నగర్‌లో శనివారం రాత్రి ఈ ఘటన జరిగింది.

స్థానికంగా వున్న ఓ బాలికపై రాజు అనే ఓ కామాంధుడు గతకొన్నాళ్ల నుంచి కన్నేస్తూ వచ్చాడు. ఆమెను ఎలాగైనా అనుభవించాలని చాలారకాలుగా ప్రయత్నాలు చేశాడు కానీ కుదరలేదు. అంతేకాదు.. ఆమె కుటుంబసభ్యుల గురించి విషయాలన్నీ ఆరా తీశాడు. వాళ్ళంతా ఇంట్లో ఎప్పుడుంటారు..? ఎంతమంది వుంటారు..? అనే విషయాలతోపాటు ఆ బాలిక ఏం చేస్తుంటుంది..? ఏ కాలేజీకి వెళ్తుంది..? అన్న వివరాల్ని సేకరించాడు. ఇదిలావుండగా.. బాధితురాలి కుటుంబసభ్యులు అందరూ శనివారం రాత్రి తమ బంధువుల ఇంటికి వెళ్లారు. దీంతో తాము అద్దెకు ఉంటున్న ఇంట్లో ఆ బాలిక తన ఇద్దరు మైనర్ సోదరులతో నిద్రించింది. ఈ విషయం తెలుసుకున్న ఆ కామాంధుడు.. ఆ బాలిక ఇంట్లోకి చొరబడి ఆమెపై అత్యాచారం చేశాడు. బాలిక బాధతో అరుస్తుండగా విని మేల్కొన్న ఏడేళ్ల బాలుడు కేకలు పెట్టాడు. దీంతో బాలుడ్ని బెడ్‌షీట్‌తో ఉరేసి దారుణంగా చంపేశాడు. అరుపులు విని ఉలిక్కిపడ్డ యజమాని.. అనుమానం వచ్చి వెంటనే పోలీసులకు సమాచారమిచ్చింది.

సమాచారం అందుకున్న పోలీసులు వెంటనే రంగంలోకి దిగారు. అయితే.. దుండగుడు అప్పటికే అక్కడి నుంచి పరారయ్యాడు. బాలుడ్ని ఆసుపత్రికి తరలించినప్పటికే అప్పుడే చనిపోయినట్టు డాక్టర్లు ప్రకటించారు. తీవ్ర రక్తస్రావమైన బాలికకు ట్రీట్‌మెంట్ అందిస్తున్నారు. కేసు నమోదు చేసిన పోలీసులు, పరారీలో వున్న నిందితుడు రాజు కోసం గాలిస్తున్నారు.