కేంద్రం నిర్లక్ష్యమే అతడ్ని విడుదల చేసింది.. నిర్భయ తల్లి

Posted: 12/21/2015 09:47 AM IST

Juvenile convict released nirbhaya parents lead massive protest at india gate

2012 డిసెంబర్ 16న నిర్భయపై సామూహిక అత్యాచారం చేసిన ఆరుగురు దోషుల్లో ఒకరికి 18ఏళ్లు నిండలేదనే కారణంతో ఉరివేయకుండా మూడేళ్లు జువెనైల్ హోంలో ఉంచి నేడు విడుదల చేశారు. ఓ స్వచ్ఛంద సంస్థ ఆధ్వర్యంలో అబ్జర్వేషన్ హోంలో రెండేళ్లపాటు గట్టి నిఘాలో ఉంచుతారు. మరోవైపు బాల నేరస్థుడికి కూడా ఉరి శిక్ష విధించాలని నిర్భయ తల్లిదండ్రులు కోరుతున్నారు. మూడేళ్లుగా వారు ఆందోళన చేస్తూనే ఉన్నారు. అయితే భారత్‌లో 18 ఏళ్ల లోపువారికి ఉరి వేసే అవకాశం లేకపోవడం వల్ల బాల నేరస్థుడు తప్పించుకోగలిగాడు. 16ఏళ్లు నిండిన ఇలాంటి దోషులకు ఉరి వేసేలా చట్టాన్ని సవరించాలని బిజెపితో పాటు మిగతా పార్టీలు కోరుతున్నా సవరణ మాత్రం జరగలేదు.

ఈ నేపథ్యంలో బాల నేరస్థుడు నేడు విడుదలయ్యాడు. ఇండియా గేట్ వద్ద నిర్భయ తల్లిదండ్రులతో పాటు అనేక మంది మద్దతుదారులు ఆందోళన చేపట్టారు. ఢిల్లీలోని జంతర్ మంతర్ వద్దకు పెద్ద ఎత్తున చేరుకున్న విద్యార్థులు నిర్భయకు న్యాయం జరగాలని, నిందితుడిని విడుదల చేయరాదని డిమాండ్ చేశారు. జువెనైల్ జస్టిస్ బోర్డ్ ఎలా నిర్ణయిస్తే అలా జరుగుతుందని ఢిల్లీ హైకోర్టు స్పష్టం చేయడంతో ఢిల్లీ మహిళా కమిషన్ సుప్రీంకోర్టును ఆశ్రయించింది. తన కుమార్తెపై అత్యాచారం చేసిన దోషిని వదిలిపెట్టడం వల్ల అతడు గెలిచినట్లైందని, తాను ఓడిపోయినట్లైందని నిర్భయ తల్లి కన్నీళ్లతో చెబుతున్నారు. మార్పును తీసుకువస్తాం, అచ్చే దిన్ అంటున్న మోడీ. ప్రబుత్వం. చట్టాలను సవరించడంలో అలక్ష్యమే వహించిందని అమె ఆరోపించారు.

జి. మనోహర్