తిరుమల శ్రీవారికి ఓ ముస్లిం కానుక

Posted: 12/31/2015 08:54 AM IST

మత సామరస్యానికి ప్రతీకగా నిలిచేలా చెన్నైకి చెందిన ఓ ముస్లిం భక్తుడు తిరుమల శ్రీవేంకటేశ్వరస్వామివారికి కూరగాయల రథాన్ని సమర్పించారు. చెన్నై, బెంగళూరు తదితర దూర ప్రాంతాల నుంచి తిరుమల అన్నదానానికి కూరగాయాలు తెస్తుంటారు. భక్తులు సయితం కూరగయాలను వితరణగా ఇస్తుంటారు. వాటిని అంతదూరం నుంచి తాజాగానే తిరుమలకు చేర్చటానికి ఏ.సి లారీ అవసరం అవుతోంది. ఆ అవసరాన్ని అధికారుల ద్వారా తెలుసుకున్న అబ్దుల్ గనీ అశోక్ లైల్యాండ్ లారీని 30లక్షల వ్యయం చేసి ప్రత్యేకంగా డిజైన్ చేయించి శ్రీవారి ఆలయ అధికారులకు అందించారు. అబ్దుల్ గనీ అందించిన లారీకి శ్రీవారి ఆలయం ముందు సాధారణంగా ప్రతి కొత్త వాహనాన్ని విరాళంగా ఇచ్చినపుడు చేసే విధంగానే అర్చకులు పూజలు చేశారు.

అనంతరం ఆలయ అధికారులు ఆ వాహనాన్ని టీటీడీ ట్రాన్స్ పోర్టు అధికారులకు అదించారు. ట్రాన్స్ పోర్టు అధికారులు వితరణను తమ రికార్డుల్లో నమోదు చేసుకుని, ఆ వాహానాన్ని అన్నదానం అధికారులకు అందించారు. ఈ సందర్భంగా దాత అబ్దుల్‌ గనీని... టీటీడీ డిప్యూటీ ఈవో చిన్నంగారి రమణ, రవాణా విభాగం అధికారి శేషారెడ్డి, అన్నదానం విభాగం అధికారి వేణుగోపాల్ తదితరులు సత్కరించారు. అబ్దుల్‌ గనీ గతంలో తిరుమల అశ్వనీ వైద్యశాలకు వైద్య పరికరాలు కూడా వితరణగా అందజేశారు.