హోంమంత్రి మహిళల మీద వివాదాస్పద వ్యాఖ్యలు

Posted: 01/30/2016 11:30 AM IST

మహిళల మీద ఎలాంటి వ్యాఖ్యలు చేసినా చాలా జాగ్రత్తగా చెయ్యాలి. ఎందుకంటే ప్రతి స్టేట్ మెంట్ మీద మహిళలు మండిపడుతున్నారు. తాజాగా శనిసింగాపూర్ లో మహిళల ప్రవేశం కోసం కొంత మంది మహిళా సంఘం నాయకులు నిరసనలు చేస్తున్నారు. అయితే మధ్యప్రదేశ్ హోంమంత్రి గారు మహిళల దేవాలయ ప్రవేశం మీద వివాదాస్పద వ్యాఖ్యలు చేశారు. మహిళలు దేవాలయాలకు వెళ్లాల్సిన పని లేదని బాబూలాల్ గౌర్‌ సెలవిచ్చారు. ఇంట్లోనే కూర్చుని ప్రార్థనలు చేసుకుంటే చాలని వ్యంగ్యంగా వ్యాఖ్యానించారు. గౌర్‌ వ్యాఖ్యలపై మహిళా సంఘాలు మండిపడుతున్నాయి.

కాగా శనిసింగపూర్ లోని శనిదేవాలయంలోకి మహిళల ప్రవేశం లేదు.. అది చాలా కాలంగా సాగుతున్న ఆచారం. అయితే కొంత మంది మహిళా సంఘాల నాయకులు మాత్రం ఇది మహిళల మీద చూపిస్తున్న వివక్షే అంటూ మండిపడుతున్నారు. అయితే మధ్యప్రదేశ్ హోంమంత్రి మాత్రం దీని మీద అనవసర, వివాదాస్పద వ్యాఖ్యలు చేశారు. గతంలో కూడా ఆయన ఇలాంటి వివాదాస్పద వ్యాఖ్యలే చేశారు. మద్యం సేవించడం మన ప్రాధమిక హక్కని అన్నారు. సమాజంలో అదొక స్టేటస్ సింబల్ గా మారిందని కామెంట్‌ చేశారు. రేప్‌లు కొన్నిసార్లు రైటని, కొన్నిసార్లు తప్పని వ్యాఖ్యానించి మహిళల ఆగ్రహానికి గురయ్యారు. దక్షిణాదిలో మహిళలు పొందిగ్గా దుస్తులు ధరిస్తారని, అందువల్లే అక్కడ రేప్‌లు తక్కువని వ్యాఖ్యానించారు.