దయ్యాన్ని వదిలిస్తానని యువతిపై మంత్రగాడు అత్యాచారం..

Posted: 08/05/2016 01:04 PM IST

Man andi his assistant arrested for molesting 19 year old girl

హరియాణాలోని ఫరీదాబాద్లో ఇంటర్ విద్యార్థిని ప్రేమ పేరుతో వంచించి అత్యాచారం చేసి, న్యూడ్ ఫోటోలతో బ్లాక్మెయిల్ చేసిన కేసులో ఒక యువకుడిని పోలీసులు అదుపులోకి తీసుకన్న ఘటనను మరువక ముందే అదే రాష్ట్రంలో మరో అత్యాచార ఘటన వెలుగుచూసింది. 19 ఏళ్ల యువతికి ఆవహించిన క్షుద్రశక్తులను వదిలిస్తానని చెప్పి 65 ఏళ్ల ఓ మంత్రగాడు పలుమార్లు అత్యాచారం జరిపిన ఘటన గుర్గావ్ లో జరిగింది. గుర్గావ్ కు చెందిన 19 ఏళ్ల బాలికకు క్షుద్రశక్తులు ఆవహించాయని దాంతో అమె కొంత విచిత్రంగా ప్రవర్తిస్తుందని భావించారు అమె తల్లిదండ్రులు.

గుర్గావ్ జిల్లాలోని సోహ్నా ప్రాంతంలోని దీన్ ముహమ్మద్ అలియాస్ దీను అనే 65 ఏళ్ల మంత్రగాడు ఇలాంటి వాటికి వైద్యాన్ని చేస్తాడని తెలుసుకున్న బాలిక తల్లితండ్రులు.. తమ బిడ్డకు కూడా భూతవైద్యంతో రోగాలను నయం చేయాలని కోరాతూ అతని వద్దకు తీసుకువెళ్లారు. తనకున్న శక్తులతో యువతికి పట్టిన దయ్యాన్ని వదిలిస్తున్నానని కుటుంబసభ్యులను నమ్మిస్తూ, యువతిపై గత కొన్నాళ్లుగా అత్యాచారం జరిపాడు. యువతికి దయ్యం వదిలివెళుతుందని చెపుతూ... యువతిని తీసుకువచ్చిన ప్రతిసారి ఆమెను రేప్ చేయడమే కాకుండా ఐదువేల రూపాయల చొప్పున తనకు ఫీజు ఇవ్వాలని మంత్రగాడు డిమాండు చేశాడు.

ఎన్ని పర్యాయాలు తీసుకెళ్లినా యువతికి రోగం నయం కాకపోవడంతో నిఘాపెట్టిన తల్లిదండ్రులు అసలు విషయాన్ని తెలుసుకుని షాక్ అయ్యారు. దీంతో మంత్రగాడి దుర్మార్గంపై గుర్గావ్ పోలీసులకు ఫిర్యాదు చేశారు. హర్యానా పోలీసులు రంగప్రవేశం చేసి మంత్రగాడు దీన్ ముహమ్మద్ ను అరెస్టు చేసి, ఆయనపై మోసం, అత్యాచారంలపై ఐపీసీ సెక్షన్ 354, 376, 420ల కింద కేసు నమోదు చేశారు. మంత్రగాడికి సహకరించిన దారాబ్ ఖాన్ ను కూడా పోలీసులు అరెస్టు చేశారు. మంత్రగాడైన దీన్ ముహమ్మద్ కు ముగ్గురు భార్యలు, పదిమంది పిల్లలున్నారని పోలీసుల విచారణలో తేలింది. నిందితుడు ముహమ్మద్ 2002లో పంచాయతీ సమితి అధ్యక్షుడిగా కూడా పనిచేశాడని పోలీసులు చెప్పారు.