నయీం కేసులో ఆ మాజీమంత్రికి నోటీసులు

Posted: 09/16/2016 09:21 AM IST

గ్యాంగ్‌స్టర్ నయీం కేసు దర్యాప్తులో వేగం పెంచిన ప్రత్యేక దర్యాప్తు బృందం(సిట్) తాజాగా కీలక అడుగువేసింది. నయీంతో చేతులు కలిపి దందాలు చేసినట్లు ఆరోపణలు ఎదుర్కుంటున్న నగరానికి చెందిన ఓ మాజీ మంత్రికి నోటీసులు జారీ చేసింది. నయీంను ముందుపెట్టి కోట్లాది రూపాయలు దండుకున్నట్టు ఆరోపణలు ఎదుర్కొంటున్న ఆయనగారిపై ఆరోపణలు ఉన్నాయి. ప్రస్తుతం విపక్షంలో ఉన్న ఈ మాజీమాత్యులు గత కొంతకాలంగా అడ్రస్ లేకుండా పోయారు. దీంతో ఆయనను విచారించేందుకు నోటీస్ పంపినట్టు తెలుస్తోంది.

నయీం ఎన్‌కౌంటర్, సోదాలు, తర్వాతి పరిణామాలతో వణికిపోయిన ఆ నేత బంధువుల ఇంట్లో తలదాచుకున్నట్లు అధికారులకు సమాచారం అందింది. అధికారంలో ఉన్న పదేళ్లు గ్యాంగ్‌స్టర్‌తో చెట్టాపట్టాలేసుకుని తిరిగినట్టు సిట్ దగ్గర పక్కా ఆధారాలు లభించినట్టు తెలుస్తోంది. నగరంలో భూమి కనిపిస్తే చాలు, జెండా పాతే అలవాటున్న ఈ మాజీ మంత్రి ఇందుకోసం నయీం సహకారాన్ని వాడుకున్నట్టు సిట్ అధికారులు అనుమానిస్తున్నారు. నయీం అండదండలతోనే ఆయన చెలరేగిపోయారని చెబుతున్నారు.

మాదాపూర్‌లో పది ఎకరాల భూమి సెటిల్‌మెంట్ వ్యవహారంలో నయీం మనుషులను పంపి మాజీ మంత్రి తనను బెదిరించారని ఓ వ్యాపారి ఫిర్యాదు చేసినట్టు సమాచారం. నయీం కేసును విచారిస్తున్న సిట్‌కు ఈ విషయంలో స్పష్టమైన ఆధారాలు లభ్యం కావడంతో ఆయనను ప్రశ్నించేందుకు రంగం సిద్ధం చేసినట్టు తెలుస్తోంది. ఈ క్రమంలోనే ఆయనకు నోటీసులు కూడా పంపించినట్టు సమాచారం. ఆయనతోపాటు విపక్షానికి చెందిన ఓ ఎమ్మెల్యేను కూడా విచారించాలని భావిస్తున్నట్టు విశ్వసనీయ సమాచారం.