‘సుప్రీం’ అల్టిమేటంతో దిగివచ్చిన కర్ణాటక..

Posted: 10/04/2016 08:24 AM IST

కావేరి జలలా వివాదంలో దేశ సర్వోన్నత న్యాయస్థానం సుప్రీంకోర్టు అల్టిమేటం జారీ చేసిన నేపథ్యంలో ఎట్టకేలకు బెట్టువీడిన కర్ణాటక ప్రభుత్వానికి దిగివచ్చింది. తమ రాష్ట్ర ప్రజల దాహార్తిని తీర్చేందుకే తమ జలశయాలలో వున్న నీరు సరిపోదని వాదిస్తూ వచ్చిన కర్ణాటక ప్రభుత్వం.. సుప్రీంకోర్టు ధిక్కారానికి పాల్పడకూడదని నిర్ణయించుకుని ఎట్టకేలకు తమిళనాడుకు నిన్న రాత్రి కావేరి నీటి విడుదల చేసింది. అయితే ఎంతమేరకు నీటిని విడుదల చేసిందన్న వివరాలను మాత్రం గోప్యంగా వుంచింది. ఇవాళ మధ్యహ్నం రెండు గంటలలోపు ఎన్ని నీళ్లను వదిలారో చెప్పాలని సుప్రీం కోర్టు నిన్న అదేశించిన నేపథ్యంలో కర్ణాటక ప్రభుత్వం ఈ మేరకు జలాలను విడుదల చేసింది.

అత్యున్నత న్యాయస్థానం కావేరి జలాల విడుదల విషయంలో ఇవాళ మరోమారు కేసును విచారించనుంది, కావేరి జలాల విషయంలో ఇప్పటికే రెండు పర్యాయాలు సర్వోన్నత న్యాయస్థానం అదేశాలను పెడచెవిన పెట్టిన కర్ణాటక ప్రభుత్వం గత్యంతరం లేకపోవడం.. న్యాయస్థానం దిక్కారానికి పాల్పడితే మనజామన్న ఉద్దేశంలో నిన్న రాత్రి నీటిని విడుదల చేసింది. కావేరి బోర్డు ఏర్పాటు విషయమై కూడా తాము కేంద్ర ప్రభుత్వాన్ని అదేశించలేమని, అది కేవలం కావేరి జల వివాద పరిష్కర ట్రిబ్యూనల్ ప్రతిపాదన మాత్రమేనని సుప్రీంకోర్టు నిన్న స్పష్టమైన అదేశాలను జారీ చేసింది. ఈ నేపథ్యంలో ఇవాళ సుప్రీంకోర్టు ఎలాంటి తీర్పును వెలువరిస్తుందో వేచి చూడాల్సిందే.