సల్మాన్ కి మళ్లీ చుక్కలు?

Posted: 11/11/2016 02:53 PM IST

బాలీవుడ్ సూపర్ స్టార్ సల్మాన్ ఖాన్ కు మరో సారి కృష్ణ జింక వేట కేసులో సుప్రీంకోర్టు నోటీసులు జారీ చేసింది. గతంలో సల్మాన్ ను రాజస్థాన్ హైకోర్టు నిర్దోషిగా ప్రకటించిన సంగతి తెలిసిందే. ఈ నేపథ్యంలో, హైకోర్టు తీర్పును రాజస్థాన్ ప్రభుత్వం సుప్రీంకోర్టులో సవాల్ చేసింది.

ఈ కేసును విచారించిన రాజస్థాన్ హైకోర్టు... జింకల కళేబరాల నుంచి తీసిన బుల్లెట్లు సల్మాన్ తుపాకీ నుంచి పేల్చినవి కాదని భావించి, ఈ ఏడాది జులై 25న ఆయనను నిర్దోషిగా విడుదల చేసింది. దీంతో, చట్టంలోని లోపాలతోనే సల్మాన్ నిర్దోషిగా విడుదలయ్యాడని... హైకోర్టు తీర్పుపై స్టే విధించాలని కోరుతూ, ఆ రాష్ట్ర ప్రభుత్వం సుప్రీం గడప తొక్కింది. ఈ క్రమంలోనే, సల్మాన్ కు సుప్రీంకోర్టు నోటీసులు జారీ చేసింది.

1998లో ఓ సినిమా షూటింగ్ సమయంలో రెండు జంతువులను సల్మాన్ చంపినట్టు కేసులు నమోదయ్యాయి. దీనికి సంబంధించి 2007లో, ఓ కేసులో ఏడాది, మరో కేసులో ఐదేళ్ల జైలు శిక్షను కింది కోర్టు విధించింది. దీంతో, ఓ వారం పాటు జోధ్ పూర్ కోర్టులో కూడా సల్మాన్ గడిపాడు. ఆ తర్వాత బెయిల్ పై బయటకు వచ్చాడు.