శశికళ మేనల్లుడి దుకాణం బంద్

Posted: 04/12/2017 09:52 AM IST

ఓటుకు నోటు వ్యవహారం ప్రకంపనలతో ఆర్కే నగర్ ఎన్నికలు వాయిదా పడటం తెలిసిందే. అయితే ఎన్నికల సంఘం, కేంద్రం కూడ గలుపుకుని కుట్ర చేసి మరీ తనని ఇందులో ఇరికించారని శశికళ మేనల్లుడు, అన్నాడీఎంకే(అమ్మ) ఉప ప్రధాన కార్యదర్శి టీవీవీ దినకరన్ చెబుతున్నాడు. తాను గెలవటం ఇష్టం లేకనే ఈసీ లేని పోని ఆరోపణలను ఆధారంగా చేసుకుని ఎన్నికలను వాయిదా వేయించిందని మీడియా ముందు వాపోయాడు.

అయితే ఉపఎన్నికలు వాయిదా పడటంతో ఇన్నాళ్లు తెరిపి ఇచ్చిన పన్నీరు సెల్వం వర్గం మళ్లీ విమర్శల దాడులు మొదలుపెట్టింది. ఉపఎన్నిక వాయిదా తమకే అడ్వాంటేజ్ అవుతుందన్న ఆ పార్టీ దినకరన్ ను ఓ క్రిమినల్ గా అభివర్ణిస్తోంది. మాజీ మంత్రి, అన్నాడీఎంకే(పురిచ్ఛితలైవి అమ్మ) నేత కేపీ మునుస్వామి మాట్లాడుతూ దినకరన్‌ ఓ స్వార్థ పరుడని, దిగజారుడు రాజకీయాలకు తెరలేపాడని తీవ్ర స్థాయిలో ధ్వజమెత్తాడు. ఆర్కేనగర్‌ లో నగదు పంపిణీలో దినకరన్‌ పాత్ర ఉందని ప్రపంచమంతా తెలిసిపోయిందని, అతని రాజకీయ జీవితం ఇక ముగిసినట్లేనని, చిన్నమ్మ లాగే ఊచలు లెక్కపెట్టాల్సిన పరిస్థితి వచ్చినా ఆశ్చర్యపోవాల్సిన అవసరం లేదని అన్నాడు.

కేవలం తన కుటుంబ సభ్యులను కాపాడుకునేందుకు ఆరుగురు మంత్రులను దినకరన్ బలిపశువులను చేశారని మండిపడ్డాడు. తక్షణమే ఈసీ దినకరన్ ను అనర్హుడిగా ప్రకటించాలని కోరాడు. అంతేకాదు డీఎంకే నేతలు కూడా డబ్బులు విరజిమ్మారని మునుస్వామి ఆరోపిస్తున్నాడు. ఎవరు ఎన్ని కుట్రలు పన్నినా తమ అభ్యర్థి మధుసూదనన్ విజయం ఖాయమని ప్రకటించాడు. కాగా, ఎన్నికల కోసం అభ్యర్థులకు డబ్బు ఎర వేశారన్న ఫిర్యాదులపై విచారణ జరిపిన ఎన్నికల సంఘం ఎన్నికలకు మూడు రోజుల ముందు ఎన్నికను రద్దు చేస్తున్నట్లు ప్రకటించిన విషయం
విదితమే.

డీఎంకే కొత్త డిమాండ్

నగదు పంపిణీకి పాల్పడ్డ అన్నాడీఎంకే ప్రభుత్వాన్ని రద్దు చేయాలంటూ ప్రతిపక్ష డీఎంకే డిమాండ్ చేస్తోంది. మంత్రి విజయభాస్కర్ తో పాటు, ఇందులో ప్రమేయమున్న మంత్రులందరినీ బర్తరఫ్ చేయాలని కోరుతోంది. అంతేకాదు ముఖ్యమంత్రి పళనీస్వామిపై సీబీఐతో విచారణ జరిపించాలని కూడా కోరుతోంది. ఈ నేపథ్యంలో, తమిళనాడు తాత్కాలిక గవర్నర్ విద్యాసాగర్ రావును ముంబైలో నేడు స్టాలిన్ నేతృత్వంలోని డీఎంకే నేతలు కలవనున్నారు.