మైనర్ బాలికపై అత్యాచారం.. నిందితుడి కోసం పోలీసుల వేట

Posted: 06/23/2017 03:10 PM IST

Sexual assault on minor police hunt for accused

అమ్మాయిలంటేనే అంగడి వస్తువుగా భావించే మగమృగాలు కంటికి నచ్చిన అమ్మాయిలపై లైంగిక వేధింపులకు పాల్పడేందుకు అందివచ్చిన ప్రతీ అవకాశాన్ని తమ చేతుల్లోకి తీసుకుంటున్నారు. గతంలో కన్యాశుల్కం పేరుతో పేద అమ్మాయిల తల్లిదండ్రులకు ధనాశ చూపి అమ్మాయిలను తమ కట్టుబాసినలుగా మార్చుకునే పురుషాహంకార సమాజంలో ఎందరో సంఘసంస్కర్థల పోరాట ఫలితంగా అది కాస్తా సమాజం నుంచి వెళ్లిపోయింది. అయితే దాని స్థానంలో వరకట్నం వచ్చి చేరడంతో .. ఇక పేదింటి అమ్మాయిలను అంగడి వస్తువులుగా చూసే దుర్ధినాలు పోయాయని అందరూ భావించారు.

కాని కావరంతో విర్రవీగుతున్న కామంధులున్న సమాజంలో మళ్లీ అలాంటి దుర్ధినాలు వస్తున్నాయి. పేద అమ్మాయిలపై కన్నువేసి వారి తల్లిదండ్రులకు డబ్బు అశ చూసి రెండో పెళ్లి పేరుతో నిట్టనిలువునా అన్యాయం చేస్తున్నారు. మొదటి భార్యతో సంసారం చేస్తూనే పగలు మాత్రం దొంగచాటుగా రెండో భార్య వద్దకు వచ్చి అత్యాచారాలకు పాల్పడుతున్న ఘటన అలస్యంగా వెలుగుచూసింది. పెళ్లి పేరుతో నమ్మించి 16 ఏళ్ల బాలికను 40 ఏళ్ల వ్యక్తి నిర్బంధించి అత్యాచారానికి పాల్పడిన ఘటన తమిళనాడులోని నాగర్ కోవిల్ లో జరిగింది.

వివరాల్లోకి వెళ్తే.. నాగర్ కోవిల్ లో రాబర్ట్‌ బెల్లార్మిన్‌ అనే పెళ్లి పేరుతో మైనర్ బాలికను రెండో వివాహం చేసుకున్నాడు. అమెను గురుసడి ప్రాంతంలోని ఓ ఇంట్లో ఉంచి కేవలం పగటి పూట మాత్రం తరచూ ఇక్కడికి వచ్చివెళుతున్నాడు. బాలిక ఎక్కడికైనా పారిపోతుందని భావించిన మృగాడు అమెను ఇంట్లోనే వుంచి బయట నుంచి తాళం వేసి నిర్భందించాడు. బాలిక దాదాపు 40 రోజులుగా ఒంటరిగా ఉంటోంది. ఆ నోటా ఈ నోటా సందేహాలు వ్యక్తం కావడంతో విషయం ఏంటో తెలుసుకునేందుకు రంగంలోకి దిగిన గ్రామపెద్దలు పోలీసులకు సమాచారం అందించారు.

పోలీసులు బాలికను విచారించగా అసలు విషయాలు బయటపడ్డాయి. రాబర్ట్ బెల్లార్మిన్‌కు ఇదివరకే వివాహమైందని.. తమది పేదకుటుంబం కావడంతో లక్ష రూపాయలు ఇస్తానని చెప్పి తిరుచెందూరులోని ఒక దేవాలయంలో తనకు ఇష్టం లేకపోయినా పెళ్లి పేరుతో దండలు మార్చుకున్నామని బాధితురాలు పేర్కొంది. తర్వాత తీసుకొచ్చి ఇక్కడ ఉంచారని, 40 రోజులుగా తనపై అత్యాచారం చేస్తున్నాడని బాధితురాలు తన అవేదనను పోలీసుల ఎదుట వ్యక్తం చేసింది.

కన్యాకుమారి జిల్లాలోని పల్లంతురాయ్ ప్రాంతానికి చెందిన నిందితుడు రాబర్ట్‌ బెల్లార్మిన్ కి తాజా సమాచారం అందటంతో అతను పరారీలో వున్నాడని పోలీసులు తెలిపారు. అయితే నిందితుడి కోసం పోలీసులు వేటను ప్రారంభించి.. ప్రత్యేక బృందాలను ఏర్పాటు చేశారు. కాగా బాధితురాలిని తల్లిదండ్రుల వద్దకు పంపాలా..? వద్దా అన్న అంశమై కూడా తీవ్ర చర్చ జరుగుతుంది. అయితే జిల్లా స్త్రీ శిశు సంక్షేమ అధికారులు మాత్రం బాలికను తంజావూరులోని బాలల సంరక్షణ కేంద్రానికి తరలించారు. ఆ బాలికకు వైద్య పరీక్షలు అందించాలని సంరక్షణ కేంద్రం నిర్వాహకులకు సూచించామని, కేసు నమోదు చేసి దర్యాప్తు చేస్తున్నామన్నారు.