భారతీయ స్టేట్ బ్యాంకు మళ్లీ షాకిచ్చింది.. ఈ సారి

Posted: 07/17/2018 01:17 PM IST

భారతీయ స్టేట్‌ బ్యాంక్‌ (ఎస్బీఐ) ఇటీవల తనలో విలీనం చేసుకున్న అనుబంధ బ్యాంకుల్లోని ఉద్యోగులపై సవతి తల్లి ప్రేమను కనబరుస్తోందన్న అనుమానాలు బలపడుతున్నాయి. తాజాగా ఆ బ్యాంక్‌ తీసుకున్న వివాదాస్పద నిర్ణయాన్ని పరిశీలిస్తే ఇదే విషయం తేట‌తెల్ల‌మవుతోంది. నోట్లరద్దు సమయంలో అదనపు పనిగంటలు పనిచేసిన ఉద్యోగులకు అందించిన పరిహారాన్ని తిరిగి వెనక్కి ఇచ్చేయాలంటూ అనుబంధ బ్యాంకుల ఉద్యోగులకు ఎస్బీఐ తాజాగా షాక్‌ ఇచ్చింది.

ఏప్రిల్‌ 1, 2017న ఎస్‌బీఐలో అనుబంధ బ్యాంకులు విలీనమయ్యాయి. ఈ నేపథ్యంలోనే అదనపు పని గంటలు పని చేసిన ఉద్యోగులకు పరిహారం అందిస్తామని గతంలో ఎస్బీఐ హామీ ఇచ్చింది. ఈ మేరకు చెల్లింపులు కూడా జరిగాయి. అయితే ఇప్పుడు ఈ విషయంలో ఎస్బీఐ కొత్త ట్విస్ట్‌ పెట్టింది. నోట్ల రద్దు సమయానికి ఎస్బీఐలో అనుబంధ బ్యాంకుల విలీనం జరగలేదు కావున.. ఆయా బ్యాంకుల్లోని సిబ్బందికి తాము పరిహారం చెల్లించేది లేదని పేర్కొంటూ కొత్త వివాదానికి తెర తీసింది.

నోట్ల రద్దు సమయంలో ఎస్బీఐ అనుబంధ బ్యాంకులైన స్టేట్ బ్యాంక్‌ ఆఫ్‌ పటియాలా, స్టేట్‌ బ్యాంక్‌ ఆఫ్‌ హైదరాబాద్‌, స్టేట్ బ్యాంక్‌ ఆఫ్‌ మైసూర్‌, స్టేట్‌ బ్యాంక్‌ ఆఫ్‌ ట్రావెన్‌కోర్‌, స్టేట్‌ బ్యాంక్‌ ఆఫ్‌ బికనీర్‌ అండ్‌ జైపూర్ లకు చెందిన 70,000 మంది అధికారులు, సిబ్బంది ఎంతో కష్టపడి అదనపు గంటలు పనిచేసి ప్రజలకు ఇబ్బంది కలుగకుండా కృషి చేశారు. ఓవర్ టైమ్‌ (అదనపు పనిగంటలు) చేసినందుకు ఎస్బీఐ హామీ ఇచ్చిన మేర పరిహారం చెల్లించింది. అయితే వీరు అదనంగా పనిచేసినందుకు అందుకున్న మొత్తాన్ని తిరిగి ఇవ్వాలని ఎస్బీఐ కోరుతుండటంతో అనుబంధ బ్యాంకుల సిబ్బంది ఆగ్రహం వ్యక్తం చేస్తున్నారు.

ఓవర్ టైమ్‌ చేసినందుకు ఇచ్చిన పరిహారం కేవలం తమ ఎస్బీఐ ఉద్యోగులకేనని, అనుబంధ బ్యాంకుల ఉద్యోగులకు ఇది వర్తించదని జోనల్‌ హెడ్ క్వార్టర్లకు ఎస్బీఐ పంపిన సమాచారంతో ఆయా బ్యాంకుల సిబ్బంది మండిపడుతున్నారు. గతంలో తమ అనుబంధ బ్యాంకుల సిబ్బందికి చెల్లించిన పరిహారంను తిరిగి రాబట్టేందుకు చర్యలు చేపట్టాలని ఎస్బీఐ తన జోనల్‌ మేనేజర్లను కోరడంతో సిబ్బంది అసహనం వ్యక్తం చేస్తున్నారు. మరోవైపు పరిహారం రికవరీ ఉత్తర్వులపై ఇటు బ్యాంకు ఉద్యోగుల సంఘాలు కూడా తప్పుబడుతున్నాయి.