ITEMVIDEOS: మద్యం మత్తు తలకెక్కి.. బతికున్న పామును మింగి..

Posted: 09/15/2018 05:15 PM IST

Drunken farmer died after eating snake in amroha

తాగిన మత్తు తలకెక్కింది. ఇకనేం.. బాగుంది.. ఇంటికి వెళ్లి ఓ ముద్ద తిని పడుకుంటే బాగుండేది. అలా కాకుండా దారిలో తన మానన తాను వెళ్తున్న ఓ పామును అటపట్టించి.. బతికున్న పామును మింగేసిస రైతు.. ఇంటికెళ్లిన నాలుగు గంటల్లోనే మృత్యువాత పడ్డాడు. ఈ ఘటన ఉత్తరప్రదేశ్‌లోని అమ్రోహా జిల్లాలో చోటు చేసుకుంది. మహిపాల్ సింగ్ అనే 40 ఏళ్ల వ్యక్తి మద్యం తాగి ఇంటికి వెళ్తుండగా రోడ్డు పక్కన ఓ పాము పిల్ల కనిపించింది.

దానిని చేతిలోకి తీసుకుని ఓ చేత్తో దానిని పట్టుకుని మరో చేత్తో బిడిని పీలుస్తూ.. ఎందుకులే అనుకున్నాడో ఏమో కానీ దానిని తిరిగి కింద వదిలిపెట్టాడు. ఇంతలో ఈ తంతంగాన్ని వీడియో తీస్తున్న కుర్రాళ్లు.. కాకా దాని పట్టుకో, దాని మూతిని గట్టిగా పట్టుకో అంటూ అరచే సరికి మళ్లీ పాము పిల్లతో అటలాడాడు. అప్పటికే అది భయంతో ముడుచుకుపోయింది. దానితో కాసేపు ఆటలు ఆడిన మహిపాల్, ఆ తర్వాత దాన్ని మింగేశాడు.

ఇంటికి వెళ్లిన తర్వాత తీవ్ర అస్వస్థతకు గురైన మహిపాల్.. నాలుగు గంటల తర్వాత చనిపోయాడు. మహిపాల్ చనిపోడానికి ముందు ఆ పాము పిల్లతో ఆడిన వీడియో సోషల్ మీడియాలో వైరల్‌గా మారింది. అతను పాముతో ఆడుతుండగా అక్కడ ఉన్న కొందరు ఆ పామును నోటిలో పెట్టుకో అన్నారు. దీంతో అతడు తలపై పెట్టుకుని నోరు తెరవడంతో అది నోటిలోకి వెళ్లిపోయింది. ఆ తర్వాత ఎంత ప్రయత్నించినా బయటకు రాలేదు. ఇంటికి వెళ్లిన తర్వాత మహిపాల్ ఆరోగ్యం క్షీణించింది. వాంతులు చేసుకున్నా పాము కడుపు నుంచి బయటకు రాలేదు. దీంతో అతన్ని వెంటనే ఆసుపత్రికి తరలించగా చికిత్స పొందుతూ చనిపోయాడు. మహిపాల్‌కు 3 కుమార్తెలు, ఒక కుమారుడు, భార్య ఉన్నారు.