విద్యార్థుల ఆత్మహత్యలకు తెలంగాణ ప్రభుత్వానిదే బాధ్యత: జనసేనాని పవన్

Posted: 04/24/2019 03:23 PM IST

Pawan kalyan reacts over inter students suicide in telangana

తెలంగాణ ఇంటర్ ఫలితాల అవకతవకలకు పలువురు విద్యార్థులు ఆత్మహత్య చేసుకోవడంపై జనసేన అధినేత పవన్ కల్యాణ్ తీవ్ర ఆవేదన వ్యక్తం చేశారు. పిల్లల ఆత్మహత్యలకు రాష్ట్ర ప్రభుత్వమే బాధ్యత వహించాలని అన్నారు. విద్యార్థుల భవిష్యత్తును ఇంటర్ బోర్డు అగమ్యగోచరంగా మార్చడం దారుణమని చెప్పారు. 17 మంది విద్యార్థులు ఆత్మహత్యలకు పాల్పడటం బాధాకరమని అన్నారు. మార్కుల విషయంలో అందోళన చెందిన విద్యార్థులు, వారి తల్లిదండ్రులు ఇంటర్మీడియట్ బోర్డు కార్యాలయానికి వస్తే.. అధికారులు వారిని చులకన చేసి వ్యాఖ్యలు చేయడం బాధాకరమని అన్నారు.

విద్యార్థులు, వారి తల్లిదండ్రులపై అధికారులు ఎదురుదాడి చేసేలా మాట్లాడుతుండటాన్ని ఖండిస్తున్నామని పవన్ చెప్పారు. పరీక్ష ఫీజు చెల్లింపు, పేపర్ వాల్యుయేషన్ నుంచి ఫలితాల వెల్లడి వరకు విద్యార్థులు, తల్లిదండ్రుల్లో ఎన్నో సందేహాలు ఉన్నాయని... వాటిని నివృత్తి చేయాలని ఆయన డిమాండ్ చేశారు. విద్యార్థులు వారి తల్లిదండ్రులకు ఇంటర్ బోర్డులో అసలేం జరిగిందో నిజానిజాలను వెల్లడించాలని డిమాండ్ చేశారు. విద్యార్థులకు ఉచితంగా రీవాల్యుయేషన్, రీవెరిఫికేషన్ చేయాలని అన్నారు. ఆత్మహత్యలకు పాల్పడిన తల్లిండ్రులకు నష్టపరిహారం చెల్లించాలని డిమాండ్ చేశారు.

విద్యార్థుల మరణాలను మాస్ హిస్టీరియా అని ఒక అధికారి పేర్కోనడం.. మరో అధికారి ఎంసెట్, జాతీయ పరీక్షలే కాకుండా ఐటీఐ, హోటల్ మేనేజ్ మెంట్ వంటి అనేక కోర్సులున్నాయని వాటిని కూడా చేసుకోవచ్చునని ఉచిత సలహాలను ఇవ్వడం మానేసి.. వారికి ఎలా తక్షణ న్యాయం అందించగలరో నిర్ణయం తీసుకోవాలని జనసేనాని సూచించారు. జీవితం చాలా విలువైనది, నిరాశతో విద్యార్థులు ఆత్మహత్యలకు పాల్పడవద్దని పవన్ సూచించారు. విద్యార్థులకు జనసేన అండగా ఉంటుందని భరోసా వపన్ ఇచ్చారు. తప్పిదాలకు కారణమైన బోర్డు అధికారులు, సాఫ్ట్ వేర్ సంస్థపై కఠినమైన చర్యలు తీసుకోవాలని, న్యాయ విచారణకు ఆదేశించాలని డిమాండ్ చేశారు.