తెలంగాణలో మరో 75 కరోనా పాజిటివ్ కేసులు.. 229కి చేరిన సంఖ్య

Posted: 04/03/2020 07:55 PM IST

75 new coronavirus cases reported in telangana tally rises to 229

ప్రపంచవ్యాప్తంగా కదం తొక్కుతూ వేలాది మంది ప్రాణాలను కబళించిన కరోనా వైరస్ మహమ్మారి.. ఇటు భారత్ లోనూ పంజా విసిరింది. భారతీయులంతా దృడవిశ్వాసంతో ఎదుర్కోన్న నేపథ్యంలో ఢిల్లీలోని హజ్రత్ నిజాముద్దీన్ మర్కజ్ మసీదు ఆధ్వర్యంలో నిర్వహించిన తబ్లిగి జమాత్ మతకార్యక్రమాలలో పాల్గొనేందుకు వచ్చిన విదేశీయుల నుంచి కరోనా వైరస్ భారతీయులకు సోకింది. దేశం నలుమూలల నుంచి వేలాది మంది ఈ కార్యక్రమానికి హాజరయ్యారు. దీంతో ఈ విషయాన్ని నిర్వాహకులు, హాజరైనవారు ఇద్దరు గోప్యంగా వుంచారు.

కాగా, తెలంగాణలో నమోదైన మరణాలతో ఈ విషయం వెలుగులోకి వచ్చింది. ఇక తెలంగాణలనూ ఈ మతప్రబోధనలకు హాజరైన వారి నుంచి ఇతతరులకు కూడా వ్యాధి సోకడంతో కేసుల సంఖ్య గణనీయంగా పెరుగుతోంది. ఈ ఒక్కరోజే 75 పాజిటివ్‌ కేసులు నిర్ధారణ అయినట్లు రాష్ట్ర వైద్య ఆరోగ్యశాఖ వెల్లడించింది.ఈ మేరకు మంత్రి ఈటల రాజేందర్‌ ఓ ప్రకటన విడుదల చేశారు. తాజా కేసులతో రాష్ట్రంలో కరోనా సోకిన వారి సంఖ్య 229కి చేరింది. కరోనాతో ఈరోజు ఇద్దరు మృతిచెందారు. సికింద్రాబాద్‌, షాద్‌ నగర్‌కు చెందిన వ్యక్తులు మృతిచెందగా.. మృతుల సంఖ్య 11కి చేరింది.

మరోవైపు కరోనా సోకి కోలుకున్న వారిలో 15 మంది ఈరోజు డిశ్చార్జ్‌ అవగా.. ఇప్పటి వరకు డిశ్చార్జ్‌ అయిన వారి సంఖ్య 32కి చేరింది. ప్రస్తుతం ఐసోలేషన్‌ వార్డుల్లో 186 మంది కరోనా రోగులు చికిత్స పొందుతున్నారు. మరోవైపు ఢిల్లీ మర్కజ్‌ వెళ్లొచ్చిన వారందరినీ గుర్తించినట్లు మంత్రి ఈటల తెలిపారు. మొత్తంగా 1130 మంది ఈ కార్యక్రమానికి హాజరయ్యారని, అందులో 160 మంది ఎక్కడ వున్నారన్న విషయం తెలియరాలేదని.. కాగా తాజాగా వారందరినీ కూడా గుర్తించామన్నారు. సీఎం కేసీఆర్‌ ఆదేశాలతో వారందరినీ ఐసోలేషన్‌ వార్డులకు తరలించామని.. యుద్ధప్రాతిపదికన కరోనా పరీక్షలు నిర్వహిస్తున్నామని చెప్పారు.