తెలంగాణ ఉద్యోగులకు ఆర్థిక శాఖ గుడ్ న్యూస్..

Posted: 06/23/2020 09:04 PM IST

కరోనావైరస్ మహమ్మారి వ్యాప్తితో దేశం మొత్తం లాక్ డౌన్ విధించిన నేపథ్యంలో రాష్ట్రానికి అదాయం భారీగా తగ్గింది. ఈ క్రమంలో తెలంగాణ ప్రభుత్వం తీసుకున్న నిర్ణయంతో తెలంగాణ ప్రభుత్వ ఉద్యోగులతో పాటు పెన్షనర్ల జేబులకు చిల్లులు పడ్డాయి. మార్చి నుంచి మే వరకు మూడు నెలల పాటు ఉద్యోగులకు, పెన్షనర్లకు కొతలు విధించారు. ఇక దేశవ్యాప్తంగా జూన్ ఆరంభం నుంచి అన్ లాక్ 1.0 విధించడంతో రాష్ట్రాలకు కాస్తో కూస్తో ఆదాయం సమకూరుతోంది. దీంతో ఇకపై తమ జీతాలు, పెన్షన్లలో కోతలు లేకుండా పూర్తి వేతనాలు కల్పించాలని తెలంగాణ ఆర్థిక మంత్రి తన్నీరు హరీష్ రావును ఉద్యో్గ జేఏసీ నేతలు కలిశారు. 

ఉద్యోగ, ఉపాధ్యాయ, పబ్లిక్ సెక్టార్, పెన్షనర్లు, కాంట్రాక్టు ఉద్యోగుల సంఘాల నేతలు ఉద్యోగుల ఐక్యవేదిక తరపున ప్రతినిధులు మంత్రి హరీశ్ రావును కలిసిన అనంతరం వారికి లభించిన భరోసాతో మంత్రి తమకు గుడ్ న్యూస్ అందించారని మీడియాకు వెల్లడించారు. తమ సమస్యలను మంత్రికి వివరించామని.. మంత్రివర్యులు తమ సమస్యలపై సానుకూలంగా స్పందించారని తెలిపారు. జూన్ నెల నుంచి పూర్తి వేతనాలు చెల్లించేందుకు మంత్రి అంగీకరించారని వెల్లడించారు. ఇక పదవీ విరమణ చేసిన ఉద్యోగులకు పెన్షన్లు ఇచ్చేందుకు మంత్రివర్యులు అంగీకరించారని తెలిపారు. 

ఈ మేరకు ఐక్యవేదిక ప్రతినిధులు ఒక ప్రకటనను విడుదల చేశారు. ఇక మార్చి నుంచి మే నెల వరకు కొత విధించిన వేతనాలపై కూడా మంత్రివర్యులతో చర్చలు జరిపామని చెప్పారు, అయితే కోత విధించిన వేతనాలతో పాటు రిటైర్డ్ ఉద్యోగుల పెన్షన్లు కూడా చెల్లింపులు జరుగుతాయని చెప్పారు, అయితే వాటిని నేరుగా వేతనాలతో కలపి కాకుండా జీపీఎఫ్ ఖాతాలో జమ చేయాలనుకుంటున్నట్టు తెలిపారని చెప్పారు. కాగా ఉద్యోగులు, ఉపాధ్యాయుల ఐక్యవేదిక మాత్రం తమ వేతన బకాయిలను జీపీఎఫ్ లో కాకుండా... నగదు రూపంలోనే ఇవ్వాలని మంత్రిని కోరామని తెలిపారు.