శివసేన ఎంపీ బెదిరింపులపై స్పీకర్ కు ఎంపీ నవనీత్ కౌర్ ఫిర్యాదు

Posted: 03/23/2021 11:22 AM IST

Navneet rana accuses shiv sena leader of threatening post uproar over anil deshmukh s sacking

మహారాష్ట్ర హోంమంత్రి అనిల్ దేశ్ ముఖ్ పై అవినీతి అరోపణలతో మహారాష్ట్రలోని మహా వికాస్ ఆఘాడీ ప్రభుత్వం ఇబ్బందులను ఎదుర్కోంటున్న తరుణంలో ఈ ఆంశంపై లోక్ సభలో చర్చ సందర్భంగా తూర్పారబట్టిన మహారాష్ట్ర అమరావతి ఎంపీ నవనీత్ కౌర్ రానాపై మరో శివసేన ఎంపి బెదిరింపులకు మరో ఇబ్బందికర పరిణామాంగా మరారింది. అనీల్ దేశ్ ముఖ్ రాజీనామా డిమాండ్ ను శివసేన ప్రభుత్వం ముందుంచిన ఈ తరుణంలో శరద్ పవార్ మీడియా ముందుకువచ్చి ఆయన కూడా దేశ్ ముఖ్ ను సమర్థించేలా వ్యాఖ్యలు చేసిన విషయం తెలిసిందే.

అయితే లోక్ సభలో చర్చ సందర్బంగా మహారాష్ట్రలోని అమరావతి ఎంపీ నవనీత్ కౌర్ మాట్లాడుతూ.. హోం మంత్రి తనకంటూ ఓ వ్యక్తిని నియమించుకుని ఆయనతో నెలకు రూ.100 కోట్ల వసూళ్లను ఇవ్వాలని టార్గెట్ నిర్ధేశించడం దారుణమని.. ఇలాంటి విషయాలు బయటకు తెలిస్తే.. దేశంలోని మిగతా రాష్ట్రాలు కూడా దీనినే అనుసరిస్తే.. దేశంలో శాంతిభద్రతలకు మరింత విఘాతం ఏర్పడే ప్రమాదముందని, ప్రభుత్వ అండతోనే అరాచకాలు సృష్టిస్తే ఇక ప్రజలకు శాంతిభద్రతలు ఎలా సమకూరుతాయని ఆమె ప్రశ్నించారు.

దాదాపు 17 పాటు సస్పెన్షన్ లో వున్న సచిన్ వాజేను పునర్నియామకం చేసింది ఉద్దవ్ థాకరే ప్రభుత్వమని.. ఇంతకాలం సస్పెన్షన్ లో వున్న వ్యక్తిని ఎందుకు రికాల్ చేశారని, ఈ క్రమంలో ముంబై మాజీ పోలిస్ కమీషనర్ పరమ్ బీర్ సింగ్ చేసిన అరోపణల్లో నిజముందని అమె అన్నారు. ఇదే వాజేను రికాల్ చేయాలని గతంలో దేవేంద్ర ఫెడ్నావిస్ ప్రభుత్వానికి అప్పట్లో మిత్రపక్షంగా వున్న ఉద్దవ్ థాకరే ఒత్తడి తీసుకువచ్చినా.. ఆయన అందుకు నిరాకరించారని.. నవనీత్ కౌర్ రానా శివసేన సర్కారును తూర్పారబట్టారు. అంతే ఇంకేముంది శివసేనకు చెందిన మరో ఎంపీ అమెను టార్గెట్ చేశారని అమె అరోపించారు.

ఉద్ధవ్ థాకరే ప్రభుత్వానికి వ్యతిరేకంగా మాట్లాడినందుకు శివసేన ఎంపీ అరవింద్ సావంత్ తనను బెదిరించారని అమె లోక్ సభ స్పీకర్ కు ఫిర్యాదు చేశారు. ముకేశ్ అంబానీ ఇంటి వద్ద పేలుడు పదార్థాల కేసులో అరెస్ట్ అయిన సచిన్ వాజే, మన్సుఖ్ హిరేన్ హత్య తదితర విషయాలపై మహారాష్ట్ర ప్రభుత్వానికి వ్యతిరేకంగా మాట్లాడినందుకు పార్లమెంటు ఆవరణలోనే తనను బెదిరించారని స్పీకర్ కు రాసిన లేఖలో నవనీత్ కౌర్ ఆరోపించారు. మహారాష్ట్రలో ఎలా తిరుగుతావో చూస్తానని, తనను కూడా జైలులో వేస్తానని హెచ్చరించారని అన్నారు.

మహారాష్ట్రలో ఎలా తిరుగుతావో చూస్తానని, తనను కూడా జైలులో వేస్తానని హెచ్చరించారని నవనీత్ కౌర్ రానా అన్నారు. ఆయన బెదిరింపులు మొత్తం మహిళా లోకానికే అవమానమని, వీలైనంత త్వరగా ఆయనపై చర్యలు తీసుకోవాలని కోరారు. అలాగే, ఆ పిర్యాదు ప్రతులను ప్రధానమంత్రి మోదీ, హోంమంత్రి అమిత్ షా, పార్లమెంటరీ వ్యవహారాల మంత్రి ప్రహ్లాద్ జోషీకి కూడా పంపారు. కాగా, నవనీత్ కౌర్ ఆరోపణలను శివసేన ఎంపీ అరవింద్ సావంత్ ఖండించారు. ఆమెను తానెందుకు భయపెడతానని ప్రశ్నించారు. ఆమె వ్యవహార శైలి, స్పందించే విధానం ఏమీ బాగాలేదని అన్నారు.