ఆర్మీ హెలికాప్టర్ కుప్పకూలడంపై ప్రజల్లో సందేహాలు

Posted: 12/08/2021 04:20 PM IST

తమిళనాడులో చోటుచేసుకన్న ఘోర ప్రమాదంలో 11 మంది మృత్యువాత పడ్డారని.. మరో ముగ్గురు మాత్రం తీవ్ర గాయాలపాలై అసుపత్రిలో చికిత్స పొందుతున్నారన్న విషయం తెలిసిందే. భారత సైన్యానికి చెందిన ఎంఐ 17 వీ5 ఆర్మీ హెలికాప్టర్‌ కుప్పకూలడంతో అందులో ప్రయాణిస్తున్న 14 మందిలో చీఫ్ అఫ్ డిఫెన్స్ స్టాప్ బిపిన్ రావత్ కూడా ఉన్న విషయం తెలిసిందే. కొయంబత్తూర్‌, కూనూరు మధ్యలోని నీలగిరి కొండల్లో ఈ ఘటన జరిగింది. ప్రమాద సమయంలో హెలికాఫ్టర్‌లో చీఫ్‌ ఆఫ్‌ డిఫెన్స్‌ స్టాఫ్‌ బిపిన్‌ రావత్‌ సహా ఆయన సతీమణితో పాటు మరో 12ఉన్నారన్న విషయం కూడా తెలిసిందే. అయితే ఈ హెలికాప్టర్ కుప్పకూలడంపై పలు అనుమానాలు రేకెత్తుతున్నాయి.

వెల్లింగ్టన్‌ ఆర్మీ కేంద్రం నుంచి బయల్దేరిన ఈ ఎంఐ సిరీస్‌ హెలికాప్టర్‌.. కాసేపటికే నీలగిరి కొండల్లో కుప్పకూలడంతో సందేహాలు వెల్లువెత్తున్నాయి. అయితే ప్ర‌త్య‌క్ష సాక్షులు చెబుతున్న ప్ర‌కారం.. హెలిక్యాప్ట‌ర్ ఒక‌దాని త‌ర్వాత ఒక‌టి రెండు చెట్ల‌ను ఢీకొట్టింది. మంటల్లో కాలిపోతూ కూలిపోయింది. కాగా, హెలికాప్టర్ చెట్లను ఢీకొనడం ఏంటన్న సందేహాలు తెరపైకి వస్తున్నాయి. అయితే మంట‌లు హెలిక్యాప్ట‌ర్‌ చెట్ల‌ను ఢీకొట్టిన త‌ర్వాత చెల‌రేగాయా..? లేదంటే స్థానిక తేయాకు తోట‌లపై ఉన్న విద్యుత్ లైన్ కు త‌గ‌ల‌డం వ‌ల్ల మంట‌లు అంటుకున్నాయా..? అనే విష‌యంలో స్ప‌ష్ట‌త‌లేదు.

బిపిన్‌ రావత్‌ ప్రయాణం చేసింది ఆర్మీకి చెందిన ఎంఐ-17 హెలికాప్టర్‌. ఇది 4వేల పేలోడ్‌ తీసుకెళ్లే సామార్థ్యం ఉన్న డబుల్‌ ఇంజన్‌ హెలికాప్టర్‌. దీనిలో 24 మంది ప్రయాణం చేసే అవకాశం ఉంది. అలాంటి విమానం ఎంత ఎత్తులో ప్రయాణిస్తోంది.? అయితే హెలిక్యాప్ట‌ర్ చెట్టును ఢీకొట్టి కూలిపోవ‌డం చూశామ‌ని ప్ర‌త్య‌క్షసాక్ష్యులు చెబుతున్న క్రమంలో ఈ ఛాపర్ త‌క్కువ ఎత్తులో ప్ర‌యాణిస్తూ చెట్టును ఢీకొట్టిందన్న ప్రశ్నలు తెరపైకి వస్తున్నాయి. అయితే ఎందుకని ఈ హెలికాప్టర్ తక్కువ ఎత్తులో ప్రయాణించింది..? లేదంటే ఎక్కువ ఎత్తులో ప్ర‌యాణిస్తూనే ఏదైనా సాంకేతిక లోపం తలెత్తి కిందికి ప‌డిపోతూ చెట్టుకు ఢీకొట్టిందా..? అనే సందేహాలు వ్యక్తమవుతున్నాయి.

వాతావరణ నివేదిక వచ్చిన తరువాతే అంతా క్లియర్ గా ఉందన్న సమయంలో బయలుదేరిన రావత్ హెలికాప్టర్ లో సాంకేతిక సమస్య తలెత్తే అస్కారం వుందా.? ఒక వేళ అది కారణం కాకపోతే.. విద్యుత్ తీగలను తగలడం.. తక్కువ ఎత్తులో ఎగరడం కూడా కారణాలు కాకపోతే.. మరే కారణం చేత రావత్ హెలికాప్టర్ ఎందుకు కుప్పకూలిందన్న ప్రశ్నలు కూడా ఉత్పన్నమవుతున్నాయి. దీని వెనుక ఏదైనా కుట్ర వుందా.? అన్న అనుమానాలు రేకెత్తుతున్నాయి. బిపిన్ రావ‌త్‌ను టార్గెట్ చేసి మిస్సైల్‌ దాడికి పాల్ప‌డి ఉండ‌వ‌చ్చా అనే సందేహాలు కూడా తెరపైకి వస్తున్నాయి.

4వేల పేలోడ్‌ తీసుకెళ్లే సామార్థ్యం ఉన్న డబుల్‌ ఇంజన్‌ హెలికాప్టర్ లో యాంత్రిక వైఫ‌ల్యం ఏమైనా చోటుచేసుకుని ఉండొచ్చా అనే అనుమానాలు కూడా క‌లుగుతున్నాయి. అయితే, ర‌ష్యా నుంచి దిగుమ‌తి చేసుకున్న ఈ అత్యాధునిక మిలిట‌రీ ర‌వాణా హెలిక్యాప్ట‌ర్లో యాంత్రిక వైఫ‌ల్యం అనేది అస‌లే ఉండ‌ద‌ని ర‌క్ష‌ణరంగ నిపుణులు చెబుతున్నారు. ఇక సాంకేతిక వైఫల్యం కూడా తలెత్తినా అది ముందుగానే తెలుసుకునే వెసలుబాటు వుందా.? అన్న కోణంలోనూ ప్రశ్నలు ఉత్పన్నం అవుతున్నాయి, ఇక ప్ర‌మాదానికి గల కార‌ణ‌ాలను ఎయిర్ ఫోర్స్ కు సంబంధించిన అధికారులే విశ్లేషించాలి.