‘తెలుగు రాష్ట్రాల్లో గొడవల్లేవు’ : గవర్నర్

Posted: 08/08/2015 03:16 PM IST

విభజన తర్వాత ఏపీ, తెలంగాణ రాష్ట్రాల మధ్య తీవ్రస్థాయిలో సమస్యలు ఏర్పడ్డాయి. అధికార పార్టీలు ఒకరిమీద మరొకరు దుమ్మెత్తిపోసుకోవడం, ప్రతి చిన్న విషయంపై ఆందోళనలు సృష్టించడం, నిందలు మోసుకోవడం.. అబ్బో కొన్నాళ్లపాటు రచ్చరచ్చ చేసేశారులెండి. ఆమధ్య రెండు తెలుగురాష్ట్రాల ముఖ్యమంత్రులు మొట్టమొదటిసారిగా కలిసినప్పుడు.. రెండు రాష్ట్రాల మధ్య వైరుధ్యాలు తొలగిపోయాయని, ఇకనుంచి అభివృద్ధి పనులు వేగవంతం అవుతాయని భావించారు.

కానీ.. అలాంటిదేమీ జరగలేదు. ఇంతలోనే ‘ఓటుకు నోటు’, ‘ఫోన్ ట్యాపింగ్’ వ్యవహారాలు తెరమీదకి వచ్చాయి. అంతే.. అప్పటినుంచి ఇప్పటి వరకు ఒకటే రాద్ధాంతం. గతకొన్నాళ్ల నుంచి కాస్త ప్రశాంత వాతావరణం వున్నప్పటికీ.. లోలోపల మాత్రం వాడీవేడీగా చర్చలు కొనసాగుతున్నాయి. ఇంతగా రెండు తెలుగు రాష్ట్రాల మధ్య వైరుధ్యాలు వుంటే.. అసలు ఎటువంటి గొడవలు లేవని గవర్నర్ నరసింహన్ తేల్చి చెప్పేశారు. అవును.. రెండు రాష్ట్రాల్లో సమస్యలు లేవని ఆయన తాజాగా వెల్లడించారు.

ప్రస్తుతం ఢిల్లీ పర్యటనలో వున్న గవర్నర్ నరసింహన్.. అక్కడ కేంద్ర హోంశాఖ కార్యదర్శి గోయల్ తో సమావేశమయ్యారు. అనంతరం మీడియాతో ఆయన మాట్లాడుతూ.. తెలుగు రాష్ట్రాల్లో ఎటువంటి సమస్యలు లేవని స్పష్టం చేశారు. అయితే.. ప్రశాంతంగా వున్న ఆ రెండు రాష్ట్రాల మధ్య సమస్యల్ని మీడియానే సృష్టిస్తోందని ఆయన కుండబద్ధలు కొట్టేశారు.

అంటే.. మీడియా రెండు రాష్ట్రాల్లో సమస్యలు వున్నట్లు మీడియా అనవసరమైన ప్రచారం చేస్తోందని.. వాస్తవానికి ఎలాంటి సమస్యలు లేవని ఆయన అభిప్రాయం వెల్లడించారు. రెండు రాష్ట్రాల్లో సమస్యలు లేవని నరసింహన్ చెప్పిన మాటలు అందరిలోనూ కాస్త సంతోషాన్ని నింపాయే కానీ.. మీడియా మాత్రం ఆయనపై ఆగ్రహంగా వున్నట్లు వార్తలొస్తున్నాయి.