నితీష్ కు అసలు సిగ్గే లేదు : మోదీ

Posted: 10/27/2015 06:49 PM IST

బీహార్ ఎన్నికలు దగ్గరపడుతున్న నేపథ్యంలో అక్కడ రాజకీయ పరిణామాలు గందరగోళంగా సాగుతున్నాయి. విపక్ష, అధికార పార్టీలు ఒకరిపమరొకరు దుమ్మెత్తి పోసుకుంటున్నారు. ఈ ఎన్నికల్లో ఎలాగైనా గెలుపొందాలని భావించిన బీహార్ సీఎం నితీష్ కుమార్.. లాలూ ప్రసాద్ యాదవ్ తో చేతులు కలిపి మోదీపై ధ్వజమెత్తడం మొదలుపెట్టారు. ఎన్నికల ప్రచారసభలో వారిరువురూ పాల్గొంటూ మోదీపై సంచలన వ్యాఖ్యలు కురిపిస్తున్నారు. ఇక మోదీ కూడా తనకున్న క్రేజీనెస్ తో అక్కడి ప్రజలను ఆకట్టుకోవడంతోపాటు తన వాక్చాతుర్యంతో లాలూ, నితీష్ లపై దుమ్మెత్తి పోస్తున్నారు. తనదైన శైలిలో వారిపై సెటైర్లు వేస్తూ.. మాటల మాంత్రికుడినంటూ తనకు తానే సాటిగా నిలుస్తున్నారు. ఇక తాజాగా ఎన్నికల ప్రచారసభలో పాల్గొన్న మోదీ.. నితీష్ పై మండిపడ్డారు.

మంగళవారం సీతామఢిలో జరిగిన ఎన్నికల ప్రచారసభలో పాల్గొన్న మోదీ.. అసలు నితీష్ కు సిగ్గే లేదంటూ ఆయనపై ధ్వజమెత్తారు. ఈ ఐదేళ్ల పాలనలో ఒక్క హామీని కూడా నితీష్ నెరవేర్చలేకపోయారని ఆయన విమర్శించారు. విద్యుత్ ఇవ్వకపోతే 2015లో ఓట్లు అడగడానికి రానని గత ఎన్నికల సమయంలో నితీష్ హామీ ఇచ్చారని.. కానీ ఆ మాటను ఆయన నిలబెట్టుకోలేకపోయారని మోదీ మండిపడ్డారు. ఈ నేపథ్యంలోనే ఆయన ‘నితీష్ కు సిగ్గన్నదే లేదా’? అని ప్రశ్నించారు. లోక్ సభ ఎన్నికల సమయంలో బీహార్ కు రూ.50 వేల కోట్ల ప్యాకేజీ ఇస్తానని తాను చెప్పానని.. కానీ రూ.లక్షా 65 వేల కోట్ల ప్యాకేజీ ఇచ్చానని మోదీ తెలిపారు. మహాకూటమి ఒక అవకాశవాద కూటమి అని, దానివల్ల ప్రజలకు ఒరిగేగేమీ లేదని ఆయన చెప్పారు. ఏదేమైనా.. మోదీ ఈ విధంగా వ్యాఖ్యలు చేయడంతో నితీష్ వర్గాలు మండిపడుతున్నాయని సమాచారం.

AS